Altia encargarase da administración de sistemas da plataforma de elearning da Universidade do País Vasco

A Universidade do País Vasco (UPV) confiou á empresa galega Altia, referente en novas tecnoloxías, o servizo de soporte 24x7 da súa infraestrutura de educación online. O anuncio foi dado hai uns días, coincidindo co pleno proceso de desescalada e, polo tanto, cunha marcada e integral aposta pola teledocencia a todos os niveis: un tipo de educación que pode levarse a cabo fronte a case calquera tipo de adversidade. A través deste acordo, Altia encargarase da administración de sistemas e do soporte da plataforma de elearning da UPV.
O contrato, que comprenden os servizos xestionados e soporte 24x7 das plataformas de ensino en liña eGela, eGela PI, terá unha duración de 12 meses prorrogable a outras dúas renovacións de 12 meses de duración cada un delas e conta cun orzamento de 96.800,00 euros.
O soporte de Altia na UPV complementa o traballo realizado polo persoal TIC da universidade e ten como obxectivo a detección inmediata e a resolución dos fallos que se poidan producir nos servizos de teledocencia da institución educativa mediante a posta en marcha dun sistema que dea servizo 24x7.
A xestión e soporte das plataformas de educación a distancia abranguen a monitoraxe e chequeado do estado destas, o seu rendemento e o uso que se fai da contorna, así como a proposta de melloras en todos os niveis (BBDD, frontais web, Moodle) co fin de mellorar a experiencia do usuario final. Tamén se inclúe a xestión da seguridade de todos os compoñentes, tests de vulnerabilidade ou apoio tecnolóxico nas actualizacións da plataforma, entre outras tarefas.