Appentra axiliza ao máximo o desenvolvemento de software con Parallelware Analyzer

Appentra Solutions, a spin-off tecnolóxica participada pola UDC e promovida por investigadores vencellados ao Centro de Investigación TIC (CITIC), vén de anunciar o desenvolvemento de novos e importantes recursos para axilizar, facilitar, optimizar e facer máis eficiente o labor de programación. Máis en detalle, trátase do Programa de Aceso Anticipado do último produto de Appentra, Parallelware Analyzer, unha serie de ferramentas de liña de comandos destinadas a axudar aos desenvolvedores de software a “construír software paralelo de mellor calidade en menos tempo”.
O programa responde ao interese da firma galega por minimizar (ou mesmo derrubar definitivamente) a barreira do desenvolvemento de software paralelo, universalizando este tipo de computación e tirándolle o máximo proveito. A iniciativa acompáñase dun chamamento aos programadores para faceren comunidade arredor do programa de aceso temperán.
Respecto das innovacións e engadidos deste respecto de contribucións previas e complementarias, Appentra defíneo da seguinte maneira: “Mentres o Parallelware Trainer ofrece un ambiente de aprendizaxe interactivo onde os usuarios poden aprender a paralelizarse, Parallelware Analyzer ofrece as ferramentas axeitadas para as etapas clave do fluxo de traballo de desenvolvemento paralelo, axudando aos desenvolvedores con análises de código que doutro xeito serían susceptíbeis de erros, consumirán un tempo e completaríanse de maneira manual”.
En termos máis concretos, Parallelware Analyzer contribúe a axilizar o fluxo de traballo de paralelaxe nos seguintes puntos: detectando defectos relacionadas co paralelismo e suxerindo correccións axeitadas, identificando oportunidades para a paralelaxe, realizando análises de ordenación de datos e, por último, xerando código equivalente en paralelo e mediante tecnoloxías e plataformas.