As galegas Torusware, AMSLab e Sigilum impulsan un proxecto sobre reciclaxe e industria 4.0 circular
venres, 5 de marzo do 2021
Torusware,
nova firma innovadora creada por un equipo de investigadores do
Centro de Investigación TIC da Universidade da Coruña (CITIC),
forma parte do consorcio galego que investiga unha técnica de
análise para incorporar material reciclado á industria 4.0
circular. O
proxecto denominado TACTICS (Novas Técnicas de Control para a
Transición Industrial cara a unha Economía Circular Segura) foi
posto en marcha xunto con outras dúas empresas galegas, AMSLab e
Sigillum.
Segundo
informan as empresas responsábeis da iniciativa, trátase do único
consorcio en Galicia que obtivo financiamento no programa Misións
CDTI. A maiores, de entre máis de 100 consorcios solicitantes, só 8
agrupacións de pemes conseguiron financiamento en España.
O
obxectivo do proxecto TACTICS é demostrar a viabilidade e idoneidade
de novas técnicas de análise química para facilitar a
incorporación de materiais reciclados á cadea de valor da industria
4.0 circular.
TACTIS
despregarase durante 29 meses co obxectivo definido de desenvolver
unha nova técnica de análise química para verificar se son o que
din ser materiais que se etiquetan como reciclados, rexenerados ou
sustentábeis. “Esta técnica podería chegar a aplicarse na
industria agroalimentaria, cosmética, téxtil ou do plástico”,
explican, engadindo que unha das vantaxes de TACTICS é que utiliza
unha técnica económica, a partir da resonancia magnética nuclear,
que se complementa con Intelixencia Artificial e Big Data. A
iniciativa conta cun orzamento de case 1,6 millóns de euros.