BBVA e a Cámara de Comercio da Coruña amosan os retos da dixitalización

A xornada Big Day, Digital Data, destinada a amosarnos os retos e posibilidades que ofrecen os recursos para a dixitalización e para a análise da inxente información que se xera nas redes, promete ser unha cita de especial interese para as nosas PEME. A cita, que se desenvolve este mércores 10 de maio na sede da Cámara de Comercio da Coruña, virá en dúas xeiras. Pola mañá, ás 11.30 horas, intervirán en rolda de prensa Rafael Domenech, responsable de Análise Macroeconómica de BBVA Research, e Juan Carlos Plaza, responsable de Produto Big Data de BBVA Data & Analitics. Falarán sobre o impacto que ten e terá a dixitalización nas empresas galegas e dos desafíos aos que se enfrontan para os seus procesos de medre e espallamento.
A intervención de Domenech e Plaza será, en palabras de BBVA (entidade organizadora do evento xunto coa Cámara da Coruña), un anticipo do miolo mesmo da xornada Big Day, Digital Data, que se celebrará esa mesma tarde na sede da Cámara da Coruña. A xeira matutina contará tamén coa asistencia de Antonio Couceiro, presidente da Cámara da Coruña, e máis de Yolanda Martínez-Bajo, directora Territorial Noroeste BBVA.
Polo que se refire á sesión vespertina, arrincará ás 18.30 horas cun acto de benvida institucional no que participará Gonzalo Ortiz, director da Cámara de Comercio da Coruña. Ás 18.35 será a apertura da xornada en si mesma, da man de Yolanda Martínez-Bajo. Ás 18.40 horas falará Miguel Cardoso, economista xefe de España BBVA Research, co relatorio Situación e retos da transformación dixital nas empresas galegas. Arredor das 19.10 horas será a quenda novamente de Juan Carlos Plaza, que abordará o relatorio Transformando con datos. A continuación será o intre do coloquio (arredor das 19.40 horas) e da clausura institucional.