Balidea lidera un proxecto de robótica e virtualidade para recuperar doentes con dano cerebral

A semana pasada presentouse no Hospital POVISA de Vigo o proxecto RECUPERA, unha iniciativa impulsada por un consorcio de empresas da nosa terra unidas baixo o paraugas común da innovación en saúde. O principal obxectivo de RECUPERA é dar forma unha tecnoloxía que bote unha man na rehabilitación de doentes con dano cerebral provocado. Máis polo miúdo, trátase de desenvolver un robot de aplicación clínica para procesos de recuperación nos que estean mergulladas persoas que fosen vítimas de doenzas como ictus ou accidentes cerebro-vasculares. Inclúe asemade un sistema de realidade virtual envolvente para permitir aos usuarios recrear actividades concretas do seu quefacer diario e prepararse, deste xeito, para levalas a cabo no plano real. Esta iniciativa está liderada por Balidea, en colaboración co Hospital POVISA, Aimen Centro Tecnolóxico e as empresas DGH, i3Te e Ficción Producciones.
Segundo nos contan dende Balidea, do robot en cuestión xa existe un prototipo operativo. “Consiste”, engade a empresa, “nun brazo robótico que se ensambla ao brazo feble dun paciente pola boneca ou a man e lle permite a realización de diversos exercicios, asistíndoo segundo os seus déficits motores”. Ademais de mellorar as habilidades do paciente, Balidea salienta que o dito dispositivo permitirá realizar un seguimento obxectivo dos progresos da persoa afectada polos danos cerebro-vasculares.
Ademais, a empresa destaca que a terapia robótica ofrecerá ao doente unha serie de vantaxes respecto da terapia convencional, como “poder levar a cabo moitas repeticións de movementos sen erros e sen fatiga”, ou alongar os adestramentos “sen necesidade de participación directa do terapeuta”. O proxecto conta cun orzamento de 1,33 millóns de euros e está co-financiado pola Axencia Galega de Innovación (GAIN) no marco do programa ConectaPEME 2016, subvencionado polo Fondo Europeo de Desenvolvemento Rexional (FEDER).
Balidea lembra que para o desenvolvemento de RECUPERA fixouse un prazo de 34 meses. A previsión é habilitar en 2018 en POVISA o prototipo perfeccionado no ano entrante. Unha vez feita a súa validación clínica, pasará a integrarse no día a día das salas de rehabilitación, completando o labor dos fisioterapeutas e terapeutas.