Borja Adsuara abrirá o ciclo HumanIA UDC o vindeiro xoves

O experto en Dereito Dixital, Borja Adsuara Varela, será o encargado de abrir o ciclo HumanIA UDC: O desafío para as Humanidades en tempos da Intelixencia Artificial, uns obradoiros organizados pola Facultade de Humanidades e o Consello Social da Universidade da Coruña, en colaboración co CITIC, para mostrar o impacto e potencial da Intelixencia Artificial nos estudos e traballos relacionados coas Humanidades.
O primeiro destes obradoiros está centrado na regulación da intelixencia artificial e será impartido por Borja Adsuara, quen baixo o título Como se debe regular a intelixencia artificial?, profundará nos aspectos xurídicos a ter en conta como son o dereito á propiedade intelectual, dereitos de imaxe, usos de alto risco e usos prohibidos, entre outros.
A intelixencia artificial está a transformar a forma en que operamos e debemos adaptar o noso sistema de principios e normas en base a esta innovadora tecnoloxía, o que supón novos retos e oportunidades para os profesionais das ciencias sociais, o dereito e a arte (aos que se dirixe esta actividade) na que tamén se abordarán as saídas laborais relacionadas cos aspectos legais, normativos e éticos que supón o uso da IA.

IA e mercado laboral

O segundo obradoiro terá lugar no CITIC o vindeiro 9 de novembro e será impartido por Paul Van Branteghem, experto en Intelixencia Artificial e cofundador de Spain-IA. Esta segunda xornada tratará sobre ChatGPT e outras aplicacións: casos de uso no mercado laboral e mostrará aos asistentes como se pode aplicar a IA nas diferentes profesións a través de exemplos reais e as ferramentas máis utilizadas. Así mesmo, permitiralles coñecer cal é o impacto real no mercado laboral.