CEL e Abanca premian a Miramar Cruises pola súa traxectoria emprendedora
xoves, 30 de xuño do 2016
A Confederación de
Empresarios de Lugo (CEL) e Abanca entregaron este 30 de xuño o
primeiro Premio CEL-Abanca ao Emprendemento na Provincia de Lugo,
outorgado desta volta á firma Miramar
Cruises, pola “súa traxectoria emprendedora, carácter
innovador, xeración de emprego e riqueza, vocación de
internacionalización e proxección de futuro”. Miramar
Cruises, como temos sinalado dende Código Cero, é unha axencia de
viaxes en liña especializada na venda de cruceiros. A empresa,
desenvolvida no viveiro da Fundación
CEL de Lugo, conta cunha
plataforma web apoiada por un call center experto no
segmento cruceirista e cun blog
de seu, converténdose deste xeito nunha das start-ups de
viaxe estais máis consolidadas. En 2014 tivo unha facturación de
dous millóns de euros. Ao ano seguinte foi quen de duplicar a cifra.
O I Premio CEL-Abanca
habilitouse en virtude dun acordo máis amplo subscrito entre ambas
as entidades en 2015 e orientado a estreitar a colaboración en
actividades “que redunden no progreso económico e a mellora social
da provincia de Lugo”. Entre estas actividades estableceuse este
galardón, dotado con 1.500 euros e que ten por obxectivo “impulsar
e dinamizar a cultura emprendedora e o tecido empresarial na
provincia”.
O acto de entrega do
cheque coa dotación do premio e diploma acreditativo tivo lugar esta
mañá na sede de AFundación, coa presenza de Walter Álvarez,
director territorial de Abanca, José Manuel Mourelo, xerente de RSC
de ABANCA, Jesús Quintá, conselleiro delegado da CEL, e Hugo
Iglesias, director executivo e fundador de Miramar Cruises.
Miramar Cruises, como
dixemos, é unha axencia online especializada na
comercialización de cruceiros, conformada por un equipo de 15
persoas, multidisciplinar e con ampla experiencia no sector
turístico, en xeral, e no segmento cruceirista, en particular.
Trátase dunha das startup de viaxes con maior proxección no
ámbito estatal, e que tras iniciar actividade a mediados de 2012 na
Fundación CEL, conta a día de hoxe xa con sedes tamén en Barcelona
e Marsella e facturou case catro millóns de euros en 2015 (dobrando
o facturado en 2014, e cinco veces máis do facturado no seu primeiro
ano completo de actividade, 2013). Dispón de máis de 2.700 opcións
de cruceiros, acordos con máis de 30 compañías navieiras e xa
embarcou a máis de 15.000 pasaxeiros desde o inicio da súa
actividade, ademais de promover a creación de Nudoss.com,
primeira rede social de cruceiros de Europa.