COFER e a Asociación de Empresas TIC de Ferrolterra achegan as PEME ás posibilidades dos dispositivos móbiles

A Confederación de Empresarios de Ferrolterra, Eume e Ortegal (COFER), en colaboración coa Asociación local de Empresas TIC, veñen de impulsar un programa formativo para optimizar e fortalecer as competencias tecnolóxicas das firmas de Ferrol e contorna. Trátase, máis en detalle, de dous cursos dirixidos a ampliar os coñecementos e habilidades das empresas cara as TIC: un curso sobre ofimática e outro sobre manexo de dispositivos móbiles. Impartiranse nas instalacións da empresa Espacio Vivo.
O primeiro obradoiro está dirixido a emprazar aos asistentes nun “nivel medio” de manexo de ferramentas ofimáticas a través da plataforma de código aberto LibreOffice. O segundo diríxese a axudar a profesionais e PEME a tirar o máximo proveito das moitas funcionalidades do móbil para o ámbito empresarial. O curso de ofimática desenvolverase os mércores e venres de 20.00 a 22.00 horas do 16 de novembro ao 2 de decembro e o formación sobre manexo do teléfono móbil impartirase os sábados de 10 a 13 horas, do 12 ao 26 de novembro.
As sesións, que se desenvolverán no centro de formación Espacio Vivo, serán de natureza práctica e encamiñados a conseguir que os participantes poidan extraer o máximo partido dos contidos. Con este fin, a organización recoméndalles que acudan coas súas propias computadoras portátiles, dispositivos intelixentes ou tabletas, “xa que así poderán pór en práctica contidos que se lles expliquen no transcurso das sesións”. Os interesados poden inscribirse na conta de correo cofer@cofernet.com ou a través do teléfono 981 33 33 22. O número de prazas é limitado e adxudicaranse por “rigorosa orde de inscrición”, tendo preferencia as empresas integradas en COFER.