ChatGPT rexistra un millón de altas nunha hora

A xeración de imaxes ao estilo do estudio Ghibli converteuse en todo un fenómeno en redes sociais

Que ChatGPT é todo un fenómeno social que está a revolucionar o mundo é algo que ninguén discute, pero o impacto desta tecnoloxía parecía limitarse á interpretación e redacción de contido de texto, pero nos últimos días, ao incorporarse un xerador de imaxes de seu (e non unha chamada externa a DALL-E) provocouse unha explosión de uso do chat de OpenIA, que nas redes sociais se fixo moi visible coa proliferación de imaxes moi coñecidas convertidas en ilustracións do estilo dos filmes de animación do Estudio Ghibli.
Pero no só as transformacións de fotografías en ilustracións con estilo xaponés están a causar furor, senón que moita xente está a crear imaxes en moitos outros estilos e con numerosos usos, de xeito que tanto hai que está a emular aos seus ilustradores favoritos, como hai que está a empregar efectos visuais de distinto tipo ou, simplemente, están aproveitar a tecnoloxía para xerar avatares e adhesivos para as redes sociais e incluso para elaborar as cada vez máis importantes miniaturas para os vídeos de YouTube.
Sam Altman chegou a dicir que a xeración de imaxes a través de ChatGPT está a ter unha demanda de proporcións bíblicas, e detallou que nos 26 meses que leva ChatGPT connosco, dando lugar a moitos fenómenos virais, ningún conseguiu o impacto do actual, que xa impresionaba coa incorporación dun millón de usuarios en 5 días... até que rexistraron un millón de altas nunha hora.
Aínda que inicialmente o fenómeno de creación de imaxes ao estilo de Hayao Miyazaki causou admiración e rexeitamento por partes iguais (xa que moitos están a criticar o que consideran que é o roubo do traballo de toda unha vida), non podemos esquecer que estamos ante unha anécdota, e o importante é o salto evolutivo que demostra ChatGPT coa súa comprensión das imaxes, que pode rematar tendo un impacto moito máis profundo no noso día a día.