Cinfo achega á UDC unha tecnoloxía que facilita a comunicación nas clases presenciais e a distancia

A Universidade da Coruña vén de dar un relevante paso en materia de dixitalización docente, da man das tecnoloxías postas en xogo pola empresa Cinfo, con sede no Campus de Elviña (no edificio do CITIC). En concreto, o Grupo de Competencia e Desenvolvemento da UDC implantou o sistema Edustream da dita firma coruñesa, referente en tecnoloxías de produción automática. O sistema, que acurta a distancia entre espazos físicos e virtuais (facilitando a comunicación entre estudantes e profesores, tanto se participan de xeito presencial nas clases como se o fan a distancia) habilitouse na Facultade de Economía e Empresa.
A solución Edustream personalizada deseñada por Cinfo púxose a punto nas clases do Mestrado da UDC en Innovación e Estratexia Dixital. Permite que o profesor poida dar a súa clase con normalidade e que os alumnos que están conectados remotamente poidan velo coma se estivesen fisicamente na aula.
O sistema, utilizando algoritmos de Intelixencia Artificial, “segue ao profesor se se move na aula para que o alumno sempre o vexa e escoite perfectamente”, explican dende Cinfo, engadindo que permite ter acceso ao que se escribe no encerado mediante capturas de imaxe que se van gardando en tempo real. Amais, posibilita visualizar calquera proxección que se faga na aula.
Unha das súas grandes vantaxes, apuntan dende Cinfo, é que todo o sistema combínase cunha solución de stream adaptativo para que o alumnado que fique en casa poida seguir a clase con independencia da calidade da súa conexión a Internet.
Amais, Cinfo adaptou o sistema para que se puidese xestionar toda a solución desde un computador situado na aula, combinándose dúas cámaras (unha que segue os movementos do profesor en tempo real e outra que enfoca aos alumnos), tirando proveito dun sistema de son de alta calidade e integrando todo o conxunto coa ferramenta de vídeo-conferencia Microsoft Teams.
O sistema complétase con dous monitores. Nun proxéctase o interface de Microsoft Teams (a solución implantada permite personalizar a vista de Microsoft Teams que se ofrece mesmo mesturando dúas vistas ao mesmo tempo) para que todo o alumnado sexa quen de verse e poida participar en calquera momento, e noutro monitor poden compartirse presentacións tanto dos alumnos ou profesor presentes na aula como cos que están remotamente.
“Estamos moi contentos coa calidade da emisión e os alumnos tamén agradecen ter un sistema interactivo como este”, mencionou Andrés Faíña, co-director do dito mestrado e presidente do Grupo de Competencia e Desenvolvemento da UDC.
Pola súa banda, Antonio Rodríguez del Corral, director executivo de Cinfo, remarcou “a importancia destas solucións de ensino, que viñeron para quedar e eliminar barreiras, para que todos poidan acceder ao mellor ensino, estean onde estean”.