Crean a Cátedra ITG-CITIC en Tecnoloxías de Aeronaves non Tripuladas
xoves, 22 de xullo do 2021
- Marcos Ortega, director da Cátedra ITG-CITIC en Tecnoloxías de Aeronaves non Tripuladas.
O reitor da
Universidade da Coruña, Julio Abalde, e o director Xeral o Instituto
Tecnológico de Galicia (ITG), Carlos Calvo, asinaron recentemente o convenio de
creación da Cátedra ITG-CITIC en Tecnoloxías de Aeronaves non Tripuladas. Mediante
esta Cátedra ITG e o Centro de Investigación en Tecnoloxías da Información e
Comunicacións (CITIC) colaborarán en proxectos de investigación en tecnoloxías
relacionadas coas aeronaves non tripuladas (drons). Ademais traballarán noutros
aspectos como a xeración de prácticas curriculares de alumnado da UDC na
empresa.
O profesor
Facultade de Informática e investigador do CITIC, Marcos
Ortega dirixirá esta Cátedra. Ortega é profesor Titular de universidade da
área de Ciencia da Computación e Intelixencia Artificial da UDC.
Esta Cátedra está
enfocada, segundo explica Ortega, “cara ao posicionamento conxunto entre a
Universidade e o ITG como referentes no desenvolvemento de tecnoloxía en materia
de aeronaves non tripuladas”. A Cátedra establece un marco de traballo onde as
diferentes áreas de investigación do CITIC de interese neste eido, como son a visión
artificial, sensórica, ou xeolocalización, entre outras poden realizar as súas
investigacións en consonancia coa demanda das necesidades reais do sector en
colaboración co ITG, dando como froito resultados de alta innovación e impacto,
segundo avanza o director da Cátedra.
Ademais,
fomentarase o coñecemento deste campo entre o alumnado da Universidade tanto de
grao como de posgrao para impulsalos cara unha especialización e
profesionalización no sector dos drons, reforzando a presencia de talento no
sector.