Cuatro prepara un concurso no que os espectadores poden participar a través do móbil

venres, 14 de xullo do 2017 Marcus Fernández

O vindeiro 20 de xullo a canle de televisión Cuatro vai iniciar a emisión de El Concurso Winapot, un espazo televisivo pioneiro que estará presentado por Maik Alexandre e Elena de José, quen guiarán aos espectadores a través de diferentes xogos que teñen dispoñibles a través dunha aplicación móbil de balde que facilita a súa participación en directo dende calquera lugar, podendo optar a facerse con premios económicos.
A aplicación de Winapot é unha creación de Winazar Games, compañía que conta coa galega Yaiza Canosa como directora de expansión, e ofrece a posibilidade de participar en pequenos xogos casual como Combina Tres ou Máis (cunha mecánica semellante á de Bejeweled ou Candy Crush Saga), Acerta e Gaña (no que haberá que responder a numerosas preguntas elixindo entre varias respostas posibles e podendo empregar vantaxes como pistas ou a eliminación de posibles respostas) e O Fotopanel (no que hai que procurar adiviñar o nome da persoa que se agocha tras un panel que irá desvelándose pouco a pouco).
A aplicación móbil permite competir en directo, pero tamén conta coa posibilidade de adestrar cando non se estea a emitir o concurso en televisión. Quen queira ir botando un ollo a esta curiosa proposta, a aplicación Winapot – Compite contra toda España xa está dispoñible para a súa descarga a través da App Store e de Google Play.

Vídeo promocional de El Concurso Winapot

PUBLICIDADE