Enxendra faise coa compañía de pagamentos entre empresas Besepa

venres, 11 de xaneiro do 2019 Redacción

A empresa especializada en xestións bancarias de empresas e organizacións, Besepa vén de ser adquirida pola galega Enxendra Technologies a través dun acordo de compra oficializado nos últimos días e xa se está procedendo á integración de ambos negocios.
Besepa, empresa participada por inversores de referencia no sector TIC como Cabiedes & Partners e François Derbaix, pasa a integrarse en Enxendra, empresa con sede na Coruña e Madrid que desenvolveu o produto Docuten, unha plataforma de facturación e sinatura electrónica, que usan grandes empresas como Desigual ou o Grupo Planeta para dixitalizar o intercambio de documentos, tales como contratos laborais, mercantís e o proceso de facturación.
A solución de pagamentos de Besepa integrarase cos servizos de Docuten, a primeira plataforma do mercado que ofrece conxuntamente firma dixital e factura electrónica. O director xeral de Enxendra Technologies, Brais Méndez, asegura que «grazas á compra de Besepa afondamos na diferenciación de Docuten, cubrindo as necesidades de dixitalización de todo o ciclo de negocio das organizacións. Os clientes pedíannos en moitas ocasións estes servizos. E, certamente, é natural debido á estreita relación que existe entre a facturación e os pagos. Agora poderemos prestar servizos propios dunha entidade de pagos». Deste xeito refórzase o obxectivo principal da compañía, crear solucións que faciliten o fluxo e automatización de todo o ciclo de documentos de negocio: contratos laborais, contratos mercantís, envío e recepción de facturas, e agora cobros e pago.
Esta adquisición tamén reforza un dos focos estratéxicos máis importantes para Enxendra Technologies para o ano 2019: a consolidación internacional do seu produto Docuten, «que se verá axilizada grazas a este novo servizo», segundo Méndez, quen engade que «até a data crecemos empregando unicamente recursos propios» matizando que «de cara á expansión internacional da compañía, non descartamos nos próximos meses buscar aliados que nos permitan afrontar o proceso de internacionalización con maiores garantías».
A transformación dixital é o núcleo indiscutible de ambas compañías e é por isto que Alberto Molpeceres, CoFundador de Besepa, non dubida en explicar que «o que nos atraeu de Enxendra é que a súa proposta de valor está moi ligada ao núcleo do noso negocio. A integración de ambas corporacións aportará un valor engadido moi potente aos nosos clientes». Alberto Molpeceres seguirá ligado ao proxecto como Payment Product Manager.

PUBLICIDADE