Estudantes do IES Ramón Menéndez Pidal exploran innovacións tecnolóxicas no CITIC

No marco da celebración do Día Internacional das Nenas nas TIC (o vindeiro 24 de abril) o Centro de Investigación en Tecnoloxías da Información e as Comunicacións (CITIC) da Universidade da Coruña organizou unha xornada especial para estudantes de bacharelato do IES Ramón Menéndez Pidal (Zalaeta).
A sesión comezou coa conferencia Por trece razóns: Diversidade & TIC, impartida pola investigadora Susana Ladra. Durante a súa intervención, Ladra abordou temas cruciais como a diversidade de xénero, a procedencia e a inclusión de persoas con diversidade funcional no ámbito tecnolóxico. Destacou que “aínda que en Galicia a porcentaxe de mulleres en universidades rolda o 50%, só un 20% dedícase ás TIC e menos do 20% á Enxeñería Informática”. Seguindo este fío, puxo o foco na relevancia de impulsar a diversidade na creación e deseño de tecnoloxías para evitar nesgos de xénero, citando exemplos como os sistemas de recoñecemento de voz que funcionan mellor con voces masculinas. “A diversidade non só é unha cuestión de xustiza social, senón tamén unha fonte de innovación e avance científico”, afirmou.
Logo os estudantes tiveron a oportunidade de visitar o Demostrador Tecnolóxico do CITIC, onde coñeceron diversos proxectos innovadores. O grupo puido experimentar de primeira man o funcionamento das lentes de Realidade Virtual e Aumentada, e explorar a Sala de Robótica, onde coñeceron o funcionamento dun can robot e un robot asistente para guías de museos. Ademais, os estudantes conversaron co investigador Omar Montenegro, quen lles explicou aspectos relacionados coa súa liña de investigación en recoñecemento facial. Tamén tiveron a oportunidade de coñecer diferentes exemplos de fabricación aditiva mediante impresión 3D.
Na Sala de Realidade Virtual, os estudantes coñeceron o proxecto de rehabilitación de mans da investigadora Andrea Caíña, que utiliza unha luva táctil con sensores para rexistrar pequenos movementos das falanxes.
En palabras do CITIC, “esta visita non só permitiu aos estudantes coñecer de preto as últimas innovacións no eido das TIC, senón que tamén lles inspirou a considerar futuras carreiras neste ámbito, destacando a importancia da diversidade e a inclusión na tecnoloxía”.