Estudantes europeos de Bacharelato visitan o CITIC

A sede do Centro de Investigación TIC (CITIC) da Universidade da Coruña recibiu este 27 de maio a visita dun grupo de estudantes de Bacharelato de centros educativos de Secundaria europeos que participan no proxecto AI+ Developing an Artificial Intelligence Curriculum adapted to European High School. O alumnado foi recibido polo subdirector do CITIC, Javier Pereira, quen realizou unha breve presentación do centro e as súas principais liñas de investigación. Logo, o responsábel da unidade de sistemas do CITIC, Alejandro Mosteiro, mostroulles o Centro de Procesamento de Datos (CPD) e explicoulles o seu funcionamento.
Para finalizar, os estudantes visitaron a sala Demostrador Tecnolóxico recentemente inaugurada (un espazo único en Galicia onde poder visualizar en directo as utilidades da Intelixencia Artificial), onde puideron coñecer de primeira man os proxectos desenvolvidos no centro nos ámbitos da robótica, as contornas virtuais e o posicionamento de obxectos en interiores, entre outros.
O proxecto europeo AI+ de innovación educativa está dirixido polo investigador do CITIC Fran Bellas e ten como obxectivo “deseñar a futura materia de Intelixencia Artificial que se impartirá en institutos de toda Europa en próximos cursos”. Realízase en colaboración con centros educativos de ensino secundario de Eslovenia, Italia, Finlandia, Lituania e España.
Esta visita enmárcase na segunda actividade formativa promovida polo proxecto AI+ desenvolvida ao longo de toda esta semana na que os estudantes dos centros educativos participaron de xeito presencial e telemático con actividades formativas e de lecer co obxectivo de achegar as tecnoloxías intelixente á xente nova.