FEGADACE premia o labor do CITIC polo seu compromiso coa inclusión

A Federación Galega de Dano Cerebral (FEGADACE) outorgou ao CITIC o Premio Miguel Blanco polo seu compromiso cos dereitos á inclusión social e ao exercicio dunha vida plena e autónoma das persoas con dano cerebral adquirido.
Nun plano máis concreto, FEGADADE destaca “a aposta do centro de investigación por aplicar a innovación e a I+D+i ao ámbito dos servizos sociais, favorecendo desta maneira a inclusión e a autonomía persoal do colectivo con dano cerebral e das persoas con discapacidade en xeral”. Por último, tívose en conta que os proxectos do CITIC estean orientados á consecución dunha sociedade máis xusta, igualitaria e accesíbel.
FEGADACE forma parte da Rede de I+D+i de Tecnoloxías de Apoio para unha Sociedade Inclusiva promovida polo CITIC coa finalidade de reunir a entidades representativas de persoas con discapacidade ou en situacións de dependencia e que serve para poñer en común necesidades e posibles solucións para a autonomía persoal e de calidade de vida.
A cerimonia de entrega do premio celebrarase o vindeiro 29 de xullo ás 12:30 horas no primeiro andar do Edificio Museo dá Cidade da Cultura. O acto formará parte da II Xuntanza do Movemento Asociativo do Dano Cerebral.