FreedomPop empregará chamadas de voz tradicionais

martes, 18 de xullo do 2017 Marcus Fernández

Hai un ano chegou a España o operador de telefonía móbil FreedomPop sorprendendo coa súa oferta que parte dun plan de balde moi atractivo, xa que achegaba 100 minutos de voz, 300 mensaxes de texto, 200 MB de datos (sen contabilizar os datos consumidos polo WhatsApp, que serán de balde) por 0 euros/mes, aínda que contaba cunha grande desvantaxe: o servizo de voz estaba baseado nunha aplicación móbil, o que facía algo complexo o seu uso, á vez que tiña problemas de calidade do servizo en función da cobertura.
Se ben a tarifa de balde é simplemente un incentivo para atraer clientes (pois FreedomPop tamén conta con plans de voz e datos adicionais, con prezos bastante axustados) os problemas iniciais da compañía (fallos de cobertura e varios meses sen a posibilidade de aceptar portabilidades móbiles) estaban a pór moi difícil o obxectivo da compañía de achegarse ao millón de clientes en 2 anos, algo que será máis doado tras cumprirse os cambios que van efectuar estes días, xa que o operador vai abandonar o seu sistema de VoIP e comezará a funcionar como un OMV máis, con chamadas de voz ordinarias e incluso con cobertura 4G, para o que os clientes actuais deberán mudar a súa tarxeta SIM actual.
Agora que FreedomPop ofrecerá chamadas de voz tradicionais, con 100 minutos de balde ao mes e 200 MB de datos (aínda que deicará de dar datos ilimitados para WhatsApp), temos unha opción moi atractiva para todos aqueles usuarios que realizan poucas chamadas e limitan o seu uso da Internet en mobilidade á mensaxería instantánea. O resto de tarifas da compañía tamén son moi agresivas, de xeito que, por exemplo, achegan 200 minutos de voz e 1 GB de datos por 4,99 euros/mes ou incluso chamadas ilimitadas e 2 GB de datos por 8,99 euros/mes.

PUBLICIDADE