Galvintec estará presente no pavillón de España no Mobile World Congress 2024

xoves, 14 de decembro do 2023 S. P.

Red.es, entidade pública adscrita ao Ministerio de Transformación Dixital a través da Secretaría de Estado de Dixitalización e Intelixencia artificial, fixo oficial os días pasados a listaxe das 45 pemes tecnolóxicas nacionais que integrarán o Pavillón de España no próximo MWC Barcelona 2024, que terá lugar entre o 26 e o 29 de febreiro en Fira Gran Vía Barcelona. Entre elas, como anunciamos hai uns días dende Código Cero, figura unha única empresa galega: Voltfer, a división de enerxías renovábeis de Galvintec - Grupo Alvariño.
Neste evento, en palabras do grupo “o máis relevante a nivel mundial para o sector dixital”, a firma do Grupo Alvariño presentará dous desenvolvementos punteiros: Moodular, unha plataforma 4.0 para a xestión integral de comercio electrónico, e Duel, unha plataforma na nube para a organización e xestión de torneos de eSports.
Segundo informou o grupo galego, Moodular é “un produto altamente innovador que permite dar resposta aos maiores desafíos do comercio na canle online, así como á súa integración co comercio físico, que deben ser xestionados de maneira eficiente para garantir o éxito do negocio: a boa xestión do inventario, a sincronización cos marketplaces, a xestión dos pedidos e pagos en tempo real, e a optimización da loxística”. Moodular, engade a compañía, constitúe unha plataforma baseada na nube que inclúe solucións de comercio electrónico nativas, módulos específicos para a sincronización cos marketplaces e unha solución de Software de Xestión de Almacéns (SGA) de última xeración para a optimización da loxística. “Ao proporcionar solucións de ecommerce nativas e nunha soa plataforma, con Moodular as empresas poden evitar a necesidade de adquirir e configurar solucións de terceiros, aforrando tempo e reducindo o custo da xestión da súa canle dixital, e permitindo ademais personalizar estas solucións á medida da empresa”, explica Manuel Balseiro, director da área TIC do Grupo Alvariño.
O segundo desenvolvemento co que acode Galvintec ao MWC Barcelona 2024 é Duel. Trátase dunha plataforma de eSports baseada na nube que permite crear, administrar e organizar torneos de videoxogos de forma rápida e sinxela, e compartir partidas e torneos con outros xogadores, mellorando a experiencia dos usuarios. Ademais, explica o grupo galego, “proporciona unha funcionalidade nova neste ámbito, permitindo que o torneo se desenvolva en base a unhas regras predefinidas e poida ter unha divulgación exponencial grazas á participación de casters e streamers que poden retransmitir en tempo real as partidas nas súas canles habituais (Discord, Twitch…)”.

PUBLICIDADE