Gradiant e Elogia botan man de Twitter para calcular o once ideal de Brasil 2014
mércores, 2 de xullo do 2014
O centro tecnolóxico
Gradiant está a ampliar as súas investigacións en redes sociais
como recursos informativos e comunicativos de primeira orde acerca de
grandes acontecementos deportivos. Como lembraremos, esta
liña de traballo abrangueu os días pasados un interesante e
pormenorizado estudo sobre o papel que xogaría Twitter na final da
Champions en Lisboa, e agora a liña de investigación volve
estar de actualidade por aplicar semellantes obxectivos no Mundial de
Fútbol de Brasil. Do que se trata agora é de calcular o once ideal
do campionato en base ao publicado polos seareiros de Twitter. A
iniciativa vén da man de Gradiant e tamén da axencia de
mercadotecnia en liña Elogia.
O estudo chámase O
Outro Mundial e é un
proxecto web que emprega unha innovadora ferramenta de análise de
publicacións nas redes sociais en tempo real, e que permite calcular
de forma automática e non supervisada estatísticas sobre o máis
comentado do Mundial de Brasil 2014. Segundo nos conta o galego Rubén
Bastón, responsable da axencia Elogia, a ferramenta que se emprega
nesta iniciativa (unha ferramenta de análise en tempo real de
publicacións en redes sociais) “posibilita avaliar os chíos
relativos ao Mundial de Fútbol, e clasificalos en grupos segundo a
mensaxe completa, non só polas súas etiquetas ou keywords,
como acontece con outras solucións de seguimento en redes sociais”.
Unha vez que se xeran dende o Twitter importantes cantidades de datos
sobre as seleccións e xogadores O Outro Mundial calcula
estatísticas inmediatas sobre o máis comentado do evento
futbolístico, de maneira automática e non supervisada.
Neste proxecto
colaborativo de I+D, baseado nunha tecnoloxía desenvolvida con
fondos FEDER, inclúense importantes avances en tecnoloxías big
data, procesamento de linguaxe humana e análise de opinión,
enfocadas a extraer coñecemento das redes sociais. Por certo que O
Outro Mundial conta cun
microsite interactivo, actualizado en tempo real, que
permite aos seus visitantes descubrir cal é o top 10 de porteiros,
defensas, centrocampistas, dianteiros e de seleccións do día, ou
visualizar o total desde o inicio da competición. Asemade,
posibilita coñecer cal é a aliñación ideal dos usuarios de
Twitter, creada cos futbolistas máis comentados do Mundial 2014, e
visualizar os chíos analizados pola ferramenta.
