Indestia e o Grupo SING recoñecidos polos Premios Spin-Off PuntoGal

Indestia é unha das iniciativas gañadoras dos Premios Spin-Off PuntoGal

A spin-off da Universidade da Coruña, Indestia (Idea Emerxente), a empresa Casa Grande de Xanceda (Selo de Calidade) e o grupo SING da Uvigo (Grupos de Investigación) resultaron elixidos gañadores polo xurado da Vi edición dos Premios Spin-Off PuntoGal, que se reuniu a semana pasada en Santiago.
O xurado acordou por unanimidade a concesión dos premios aínda que houbo un longo debate en cada categoría, Entre os obxectivos do certame figuran recoñecer a transferencia de coñecemento entre a Universidade e a Empresa e alentar o emprendemento que xurde desde os grupos de investigación universitarios, así como premiar o uso de galego na empresa e a presenza das mulleres nas empresas e grupos de investigación.
Na categoría de Idea Emerxente, que premia a empresas de recente creación ou que levaran ao mercado unha idea innovadora en tempos recentes, foi elixida como gañadora a spin-off da UDC Indestia. O xurado destacou a posta en marcha dunha idea orixinal dentro do sector das TIC e conseguir clientes importantes para o seu produto PhotoIlike, unha ferramenta baseada en intelixencia artificial que permite seleccionar as fotos que van a ter maior impacto entre o público, con aplicación polo de agora ao sector inmobiliario.
Finalmente, na categoría de Grupos de Investigación resultou gañadora a candidatura do grupo SING (Sistemas Informáticos de Nova Xeración), adscrito á Uvigo e que desenvolve a súa actividade no campus de Ourense. O xurado destacou como méritos da súa proposta a sólida traxectoria no campo da investigación biomédica e a ciberseguridade, con proxectos destacados mesmo no ámbito estatal. Ademais, tívose en conta a importante presenza de mulleres entre o seu corpo de investigadores.
Os integrantes do xurado son as investigadoras María Xosé Malmierca, Edita de Lorenzo, Andrea Muras e Sonia Martínez Arca, o representante da Secretaría Xeral de Universidades, Faustino Infante Roura, e a CEO da empresa Galchimia, Carme Pampín. O acto de entrega dos premios terá lugar en Vigo nas próximas semanas e contará coa presenza de destacados representantes institucionais, académicos e empresariais.