Investigadores do CITIC da UDC participan nun proxecto piloto de tecnoloxía 5G

De esquerda a dereita (superior): Jorge Novo e Marcos Ortega; o doutor Fernández Vigo; e os especialistas en oftalmoloxía do CIOA José Ignacio Fernández-Vigo, Ignacio Almorín Fernández-Vigo e Bachar Kudsieh/ Na fileira inferior o membro do CITIC Pablo Guillemette e o responsable do proxecto en Telefónica Innovación, Juan Cambeiro

Os investigadores do Centro de Investigación TIC (CITIC) da UDC, Marcos Ortega e Jorge Novo, participan no proxecto Ocuexplorer 5G, coordinado polo Centro Internacional de Oftalmoloxía Avanzada Profesor Fernández Vigo (CIOA) e liderado por Telefónica. Trátase dunha das iniciativas de investigación e desenvolvemento promovidas polo Goberno a través dunha convocatoria pública de axudas cun orzamento agregado de máis de 36 millóns de euros, dos que máis de 10 millóns serán co-financiados por Red.es a través dos fondos FEDER da UE. Este piloto inclúe oito casos de uso que se desenvolverán en Galicia a cargo da Unión Temporal de Empresas composta por Telefónica, Ericsson, Nokia, Cinfo, Idronia, Telnet Redes Inteligentes e o Centro Internacional de Oftalmoloxía Avanzada Fernández-Vigo.
Segundo explica o CITIC, Ocuexplorer 5G baséase en novas tecnoloxías ópticas, técnicas de telecontrol, comunicacións 5G e Intelixencia Artificial e ten como obxectivo facer máis accesible o coidado oftalmolóxico de pacientes, principalmente a persoas maiores, persoas con problemas de mobilidade e procedentes de lugares con difícil acceso aos centros médicos. Deste xeito, o prototipo de teleoftalmoloxía avanzada Ocuexplorer 5G constitúe un mecanismo de axuda para os oftalmólogos, que permita chegar a unha maior poboación de forma máis eficiente, avanzando no desenvolvemento dunha oftalmoloxía preventiva para toda a poboación.
O CITIC lembra que “a teleoftalmoloxía pode ser unha ferramenta clave nestes momentos de pandemia, xa que practicamente podería consultarse a distancia, evitando desprazamentos aos centros médicos e evitando así a exposición ao virus”.
O prototipo desenvolvido polo consorcio formado polo Centro Internacional de Oftalmoloxía Avanzada Profesor Fernández Vigo (CIOA), Telefónica, Idronia e o CITIC consta dun dispositivo que toma imaxes de alta definición do ollo, que posteriormente filtra utilizando técnicas de Intelixencia Artificial. As imaxes envíanse ao oftalmólogo en tempo real, aproveitando o amplo largo de banda que permite a rede móbil 5G.
Os investigadores do CITIC Marcos Ortega e Jorge Novo foron os encargados de desenvolver o software de Intelixencia Artificial capaz de analizar retinografías e identificar potenciais riscos de patoloxías oculares. O sistema permite realizar un cribado de cantidades masivas de información e notificar ao oftalmólogo cada vez que se identifique unha retinografía con parámetros fóra da normalidade, para que sexa examinada de maneira axeitada.
O proxecto Ocuexplorer 5G aportará progresos na prevención e diagnóstico das doenzas do ollo, conseguindo un sistema de oftalmoloxía preventiva máis avanzado e intelixente a través da nova xeración de tecnoloxía móbil 5G.