Investigadores do CITIC mostraron na ECAI as facetas máis avanzadas da IA

No marco da 27th European Conference on Artificial Intelligence (ECAI), organizada en Compostela polo CiTIUS da USC, celebrouse recentemente o International Workshop on AI in Education and Educational Research (AIEER), organizado por Francisco Bellas e Óscar Fontenla, investigadores do CITIC da Universidade da Coruña. Este evento reuniu a expertos de distintos ámbitos da Intelixencia Artificial (IA) aplicada á educación, con relatores tanto de áreas técnicas como de ciencias sociais, e permitiu o intercambio de ideas nun sector chave en plena expansión.
Durante o workshop presentáronse un total de 16 relatorios que abrangueron temas de vangarda como a creación de sistemas de titorado intelixente, o impacto dos modelos de linguaxe (LLMs) na educación, o desenvolvemento de currículos específicos para a Formación Profesional e a posta en marcha de sistemas automáticos de corrección.
A audiencia tamén tivo a oportunidade de asistir á charla plenaria do profesor Wayne Holmes, da UCL, quen ofreceu unha visión crítica e reflexiva sobre o rol da Intelixencia Artificial na educación, espertando un vivo interese entre as persoas asistentes.
Un dos momentos destacados do evento foi a presentación do investigador pre-doutoral do CITIC, Antonio Leis, quen expuxo o seu traballo titulado Personalized Learning of Programming Fundamentals through Robotic Simulations, enmarcado nun proxecto do CITIC orientado a facilitar a aprendizaxe da programación a través de simulacións robóticas. O proxecto, en desenvolvemento desde hai un ano, foi probado nun colexio público durante o ano 2024, mostrando prometedores resultados na personalización da aprendizaxe dos fundamentos da programación.
A organización da xornada de traballo AIEER subliña o compromiso do CITIC e dos seus investigadores por “impulsar a aplicación da IA no ámbito educativo, fomentando unha visión crítica e á vez práctica das ferramentas dixitais e os seus beneficios para a formación do futuro”.