Investigadores do CITIC presentan ante o CHUAC os seus avances en diagnose da COVID-19 baseados en Intelixencia Artificial

luns, 20 de xullo do 2020 S. P.

Marcos Ortega e Jorge Novo, investigadores do Centro de Investigación TIC (CITIC) da UDC, presentaron ante o Servizo de Radioloxía do Complexo Hospitalario Universitario da Coruña (CHUAC) os seus avances acadados en materia de sistemas automáticos de apoio ao diagnóstico de COVID-19 baseados en imaxe radiolóxica mediante o uso de técnicas de Intelixencia Artificial como a aprendizaxe profunda.
Segundo reflectiu o CITIC, esta ferramenta é capaz de distinguir entre individuos sen sintomatoloxía, pacientes con sintomatoloxía compatíbel con pneumonía ou outras afectacións pulmonares e aqueles cuxa sintomatoloxía específica é compatíbel con COVID-19.
O centro engade que os desenvolvementos realizados permiten “obter resultados moi fiábeis mesmo en imaxes de baixa calidade provenientes de dispositivos de radiografía portátiles”, o que aumenta, engade o CITIC, a utilidade do sistema ao ser moi axeitado para utilizar en servizos de urxencia, cribados ou ata en UCI, “escenarios onde a mobilidade reducida e a necesidade de inmediatez na toma de decisións son aspectos clave no diagnóstico e seguimento do paciente”.
Na reunión aproveitouse ademais para avanzar nas vías de colaboración establecidas entre os investigadores do CITIC e do CHUAC. Así mesmo, comezouse coa planificación da implantación da solución de apoio ao diagnóstico nos sistemas do hospital de cara a mellorar a capacidade de resposta e seguimento ante posíbeis situacións de urxencia en relación coa crise do COVID-19.

PUBLICIDADE