Investigadores do CITIC reciben un premio da Fundación BBVA á mellor contribución en estatística
luns, 17 de agosto do 2020
A
Fundación
BBVA premiou como mellor contribución metodolóxica aplicada en
estatística un proxecto no que participan investigadores do CITIC
(Centro de Investigación TIC) da UDC. Os autores e responsábeis
da iniciativa distinguida son Inés Barbeito e Javier
Tarrío-Saavedra, investigadores do centro coruñés; Sonia Zaragoza,
adxunta a Transferencia no Vicerreitorado de Política Científica,
Investigación e Transferencia da UDC, e Salvador Naya, vicerreitor
de Política Científica, Investigación e Transferencia da UDC e
investigador do CITIC. O proxecto foi publicado en 2017 na revista
Applied Energy.
Concretamente,
trátase dunha aplicación para a mellora da eficiencia enerxética,
que supervisa, controla e optimiza o consumo de enerxía en
edificios, buscando ao mesmo tempo o máximo confort térmico,
explica o CITIC, engadindo que para o devandito cometido a ferramenta
bota man do procesado de datos almacenados nunha web desenvolvida de
maneira específica, e tamén calcula o correspondente aforro
enerxético, empregando un software de código aberto. O resultado,
apunta o centro, é “un sistema interdisciplinar, que combina
investigación en enxeñaría, computación e estatística, e cun
alto impacto social pola súa contribución á mellora da eficiencia
enerxética”.
Trátase
dun do catro traballos premiados pola Fundación BBVA na primeira
edición duns premios que nacen para incentivar aos investigadores
españois en Estatística e Investigación Operativa, e a través
deles impulsar a proxección destas dúas disciplinas ao conxunto da
sociedade.