Mar España Martí, Colexiada de Honra do CPEIG
xoves, 15 de xuño do 2017
O
Colexio Profesional de Enxeñaría en Informática de Galicia (CPEIG)
vai distinguir este venres, no marco da Noite
da Enxeñaría en Informática (este 16 de xuño en Santiago), a
Mar España Martí, directora
da Axencia Española de Protección de Datos. Máis polo miúdo, a
entidade profesional que preside Fernando Suárez recoñecerá a Mar
España como Colexiada de Honra, polo “seu apoio continuo
á difusión da
salvagarda da información
de carácter persoal e ao uso das novas
tecnoloxías
como ferramenta de progreso, convidando
á súa vez á reflexión sobre os perigos dun emprego non axeitado”.
Segundo
nos recorda o CPEIG, Mar
España é licenciada en Dereito pola Universidade Pontificia de
Comillas, Máster en Protección Internacional en Dereitos Humanos
pola Universidade de Alcalá e experta en xestión de entidades sen
ánimo de lucro pola Fundación Luis Vives. Ademais,
é funcionaria de carreira do
Corpo Superior de Administradores Civís do Estado na especialidade
xurídica desde 1989. En canto á súa actividade académica, foi
profesora do Máster de Protección Internacional de Dereitos Humanos
da Universidade de Alcalá, profesora do Máster de Acción Política
do Colexio de Avogados na Universidade Rey Juan Carlos e profesora
colaboradora de Dereito Administrativo en ICADE.
Baixo
o seu mandato como directora da AEPD dende
xullo de 2015, este organismo puxo en marcha un Plan Estratéxico
con máis de 100 iniciativas que inclúe, entre outros puntos, o
desenvolvemento de accións que favorecen a innovación e a confianza
dixital, así como a realización de labores proactivos para
detectar o impacto que poden ter os novos desenvolvementos
tecnolóxicos na privacidade. Neste sentido, a Axencia creou
a Unidade de Avaliación e Estudos Tecnolóxicos, que ten entre
as súas funcións o establecemento de canles de colaboración
tecnolóxica con universidades e grupos profesionais.
Noite
da Enxeñaría en Informática
A
Noite da Enxeñaría en Informática de Galicia é o evento TIC
referente de Galicia, no que representantes do empresariado,
profesionais e persoas colexiadas se reúnen ao redor dunha profesión
cunha crecente proxección na sociedade.
O
ente colexial entregará os seus premios a partir das 21.00 horas da
noite de mañá venres no Hotel Monumento San Francisco, en Santiago
de Compostela, con X. Touriñán como mantedor. Previamente, haberá
un cóctel de benvida para os preto de 400 convidados que asistirán.
O Mago Tamariz ofrecerá un espectáculo para os asistentes.