Minerva (Santiago) forma en novas ferramentas á veciñanza en risco de exclusión

O Concello de Santiago, a través do departamento de Emprego, ten en marcha o proceso de selección de participantes nos itinerarios formativos do programa Minerva, un proxecto de formación para o emprego no que se van investir tres millóns de euros, dos que 1,8 millóns proceden de fondos europeos.
As accións están dirixidas de maneira prioritaria aos colectivos vulnerables e con maiores dificultades de inserción laboral como o das mulleres, as persoas paradas de longa duración, inmigrantes, persoas con discapacidades, e menores de 30 anos.
Nos últimos días comezaron dous dos itinerarios formativos incluídos no programa, o de Actividades loxísticas de almacén, que se desenvolverá ata finais de marzo; e o de “hixiene e atención domiciliaria sanitaria, que rematará o 14 de abril. Está a piques de comezar tamén o itinerario de Edición de vídeos con After Effects e para o que aínda hai prazas dispoñibles, segundo confirmou o Concello. A inscrición pódese facer a través do formulario dispoñible na web de Minerva.
Lembrar que Alter Effects é un software moi estendido e popular de postprodución, especializado na creación de gráficos en movemento (motion graphics), animacións e efectos visuais (VFX) para cinema, televisión e web. Funciona mediante capas e fotogramas clave, permitindo compoñer, animar texto, crear títulos e engadir efectos especiais complexos a proxectos de vídeo.
60 itinerarios formativos
A concelleira de Dereitos Sociais, Promoción Económica e Xuventude, María Rozas, lembrou que no marco do programa Minerva vanse desenvolver 60 itinerarios formativos distintos, con formación específica, prácticas profesionais titorizadas, formación transversal e formación complementaria.
María Rozas apuntou que “respondendo ás necesidades do mercado laboral, a maioría dos itinerarios, preto de 40, están relacionados co sector dixital e as TIC (Tecnoloxías da Información e a Comunicación), e atenden a disciplinas como a intelixencia artificial, a realidade aumentada, a creación de videoxogos ou o desenvolvemento de webs”.
Ademais, o programa Minerva atende outro tipo de sectores con dificultades para atopar persoal, con itinerarios relacionados coa construción, como os de albanelería ou pintura; o comercio, con formación en oficios que non teñen relevo xeracional como o de carniceiro; ou a atención á dependencia, como os de atención sanitaria domiciliaria ou coidado das persoas maiores.
A concelleira recordou que para inscribirse nas accións formativas do programa Minerva, é preciso estar en situación de ser demandante de emprego. Cada un dos itinerarios formativos terán 16 alumnas e alumnos, e as persoas participantes terán dereito a unha bolsa de formación, en función dos requisitos de renda. Esta axuda pode roldar os 300 euros, dependendo da duración da actividade, que vai desde as 134 ata as 384 horas. Semanalmente impartiranse unhas 25 horas de formación, de modo que os itinerarios poden durar entre un e dous meses. Ademais, complementaranse con prácticas profesionais titorizadas en empresas de cada sector.