Netflix reforza as súas historias interactivas cun episodio especial de Black Mirror

luns, 31 de decembro do 2018 Marcus Fernández

Hai ano e medio Netflix estreou un formato de historias interactivas comezando polas series de animación de El Gato con Botas: Atrapado en un cuento épico e Buddy Thunderstruck: La lista de quizá, que permiten que os usuarios elixan o camiño polo que transcorren as narracións na liñas dos libros de Elige tu propia aventura (publicados en España por Timun Mas nos anos 80), e aínda que as pezas audiovisuais interactivas non sexan unha grande novidade (de feito, eran bastante frecuentes nos DVD dirixidos a cativos e incluso deran pé a videoxogos na época dos LaserDisc), están a conseguir grande visibilidade grazas á última entrega da serie Black Mirror, titulada Bandersnatch.
Esta nova produción preséntanos a un programador que en 1984 está a adaptar unha novela de fantasía a un videoxogo mentres comeza a cuestionar a realidade, levándonos a unha narración con múltiples finais (12 finais absolutos e outros 4 que permiten desfacer a última acción). Cómpre advertir de que a interacción dos episodios non é posible en todos os dispositivos capaces de reproducir Netflix, estando tal funcionalidade preparada principalmente para dispositivos móbiles, o que creou bastante frustración entre os espectadores, que toparon como non podían gozar da experiencia en Apple TV, Chromecast, Fire TV Stick, a aplicación para Windows ou nalgunha das versións da web de Netflix (as baseadas en Silverlight).
Pero os creadores de Black Mirror non quixeron limitar a interacción á elección de camiños na historia, senón que tamén apostaron polo transmedia, e crearon a páxina web da suposta compañía de videoxogos de Bardersnatch, Tuckersoft, na que podemos atopar os seus distintos xogos, e incluso ofrece a posibilidade de descargar o xogo Nohzdyve para poder xogalo nun emulador de ZX Spectrum.
Temos así unha peza audiovisual que quere deixar pegada, polo que o seu lanzamento estivo bastante coidado e arroupado para dar que falar e espertar a curiosidade sobre as posibilidades das historias interactivas que as plataformas dixitais teñen moitas facilidades para explotar no futuro, de xeito que a ficción televisiva e os videoxogos poden estar cada vez máis preto.

PUBLICIDADE