Nieves R. Brisaboa, coordinadora da área TIC para proxectos internacionais da Axencia Estatal de Investigación
venres, 18 de marzo do 2022
A
investigadora do CITIC (Centro de Investigación TIC da Universidade
da Coruña) Nieves
R. Brisaboa vén de ser nomeada coordinadora da área TIC para
proxectos internacionais da Axencia Estatal de Investigación (AEI).
En virtude deste recoñecemento, pasa a ser xestora da área
científica de Tecnoloxías da Información e das Comunicacións
(TIC), en concreto, dentro do departamento de ciencias da computación
e tecnoloxía informática.
Como
colaboradora da Axencia Estatal de Investigación, dependente do
Ministerio de Ciencia e Innovación, Brisaboa realizará tarefas de
avaliación e seguimento científico-técnico de actividades,
proxectos, infraestruturas científicas e recursos humanos. A súa
función, segundo informan fontes do CITIC, “será asesorar e
colaborar na xestión, avaliación e supervisión dos programas e
convocatorias da AEI, identificando os mellores proxectos, persoal
investigador, infraestruturas e outros recursos, que reúnan méritos
para ser financiados”. Así mesmo, oficiará de interlocutora entre
a AEI e a comunidade científica do seu ámbito científico-técnico.
Nieves
R. Brisaboa é catedrática de Linguaxes e Sistemas Informáticos da
Universidade da Coruña. En 2019 recibiu o Premio Nacional de
Informática, concedido pola Sociedade Científica Informática de
España (SCIE) e a Fundación BBVA. Foi xestora do Plan Nacional de
I+D en Tecnoloxías Informáticas (TIN), xestora do Plan Galego de
I+D+i (INCITE) de Sociedade da Información e coordinadora no ámbito
das TIC do Plan Andaluz de I+D+i, entre outros cargos.