Ningún ordenador de Apple ten potencia dabondo para facer funcionar unhas Oculus Rift

Durante moitos anos, á hora de comparar PC con Mac, non eran poucos os que apuntaban que os equipos de Apple non eran bos para gozar de xogos, o que parecía que estaba a arranxarse ultimamente con certas plataformas como Steam, que non deixan aos Mac de lado, pero continuando a ter un volume de xogos moi reducido; pero esta guerra de plataformas atopou agora un atranco inesperado: a realidade virtual.
Aínda que 2016 é claramente o ano da emerxencia da realidade virtual, as solucións como Oculus Rift non están dispoñibles para Mac, e a explicación que deu nunha entrevista un dos fundadores de Oculus VR, Palmer Luckey, é moi clara: sacarán Oculus Rift para Mac cando Apple lance un ordenador bo dabondo para funcionar coa súa realidade virtual.
As declaracións de Luckey están a provocar bastante rebumbio, pois non podemos esquecer que a compañía da mazá ten equipos con gráficas dedicadas relativamente potentes, pero é innegable que Apple non dá prioridade as gráficas de alta gama, xa que os seus ordenadores non están dirixidos a xogadores. Iso fai que entendamos as palabras do co-fundador de Oculus VR: “Poder mercar un Mac Pro de 6.000 dólares cunha gráfica AMD FirePro D700 de alta gama, e continuaría sen chegar ás nosas especificacións recomendadas”. Tras esta dura crítica aos equipos de Apple, recoñece que a súa compañía estaría encantada de traballar con Mac se finalmente lanzan algún ordenador óptimo para correr xogos esixentes e poder así funcionar coa súa solución de realidade virtual.
Actualmente poden reservarse distintos lotes de ordenador + Oculus Rift de varios fabricantes, que parten de prezos de 1.499 dólares, ou sexa, que os ordenadores de 1.000 dólares serían dabondo para mover a realidade virtual, que curiosamente non teñen equivalentes en potencia gráfica en todo o catálogo de Apple, xa que os seus equipos están configurados dando prioridade a elementos distintos aos das potentes nVIDIA GeForce GTX 970 cun mínimo de 4 GB de memoria que esixen as Oculus Rift para procesar os seus esixentes gráficos.