No inverno teremos unha nova consola Evercade

martes, 31 de maio do 2022 Marcus Fernández

Nos dous últimos anos tivemos no mercado un par de consolas retro bastante curiosas, por optar por funcionar con cartuchos cunha pequena selección de xogos con licenza oficial: a portátil Evercade e a doméstica Evercade VS. E agora anuncian unha terceira consola, a Evercade EXP, que sería unha consola portátil que acadaría un rendemento á altura da Evercade VS.
A nova consola sería compatible cos máis de 30 cartuchos que recompilan máis de 300 xogos clásicos, destacando a Evercade EXP por incluír 18 xogos de serie, incluíndo tamén na caixa o cartucho IREM Arcade 1, que inclúe 6 clásicos (R-Type, In The Hunt, Moon Patrol, 10 Yard Fight, Battle Chopper e Lightning Swords).
A Evercade EXP conta cunha pantalla IPS de 4,3 polgadas con resolución de 800 x 480 píxeles, que conta cun modo TATE que permite xirar 90 graos a consola para gozar dos xogos orientados en vertical. A consola tamén conta con Wi-Fi (o que facilita a súa actualización), tamén inclúe USB-C e incluso saída mini-HDMI a 720p para poder gozar dos xogos en pantalla grande.
No mes de setembro darán abrirán o proceso de reserva e detallarán este produto que chegará no inverno a un prezo de venda recomendado de 149,99 euros.

Vídeo de presentación da Evercade EXP

PUBLICIDADE