O CESGA inaugura o seu novo superordenador: o FinisTerrae III

O FinisTerrae III é o novo supercomputador do Centro de Supercomputación de Galicia (CESGA) que aplicará a súa capacidade de computación para realizar predicións do tempo meteorolóxico, avaliacións xenómicas e para monitorizar a evolución epidemiolóxica do SARS-CoV-2, o coronavirus causante da pandemia da COVID-19.
O novo supercomputador foi inaugurado hoxe na sede do CESGA, en Santiago de Compostela, nun acto presidido polo presidente da Xunta de Galicia, Alfonso Rueda Valenzuela, e ao que asistiron o vicepresidente de Investigación Científica e Técnica do CSIC, José María Martell, e do delegado institucional en Galicia, Javier Rey Campos.
O presidente da Xunta, Alfonso Rueda, reafirmou o obxectivo de colocar a Galicia na elite das tecnoloxías de alta prestación ao servizo da investigación e da industria asegurando que «xa estamos no grupo cabeceiro e nunha situación punteira, pero temos que ir a máis, e imos ir sen ningunha dúbida», ao que engadiu que Galicia alberga o segundo gran centro de computación de España, do que puxo en valor que é «un dos máis competitivos de Europa».
Na súa intervención o presidente da Xunta tamén apuntou que Galicia cos centros de investigación, coa tecnoloxía de altas prestacións e cos grupos de traballo que dispón conta con «razóns de sobra» para postularse a albergar a sede da Axencia Española de Supervisión de Intelixencia Artificial. «Temos argumentos moi sólidos para que Galicia sexa unha candidata a ter en conta», salientou.
O supercomputador, albergado no CESGA, púxose en marcha hai uns meses, abríndose así a prestar servizos a comunidade científica e de innovación en Galicia e aos grupos de investigación do CSIC en toda España.
Trátase dun nodo da Infraestrutura Científico Técnica Singular (ICTS) distribuída de computación e datos científicos Rede Española de Supercomputación (RES). Foi adxudicado en 2021 á empresa Atos. Supón un investimento de 7 millóns de euros, achegados pola Comisión Europea, vía fondos FEDER (5,6 millóns; 80%), xunto ao cofinanciamento da Xunta de Galicia (1,05 millóns; 15%) e do CSIC (0,35 millóns; 5%).
FinisTerrae III permite resolver 4.360 billóns de operacións matemáticas por segundo, o que supón multiplicar por unha ducia a capacidade de cómputo do anterior supercomputador FinisTerrae II, sendo por tanto clave para acurtar de modo significativo os tempos na obtención de resultados, abordar problemas máis complexos que hoxe se presentan en I+D+i e que fan uso de inxentes volumes de datos. Incorpora un simulador de computación cuántica de 30 Qbits que é o primeiro da súa clase en España.
Entre os beneficiarios do novo supercomputador figuran os seguintes usuarios do CESGA: Meteogalicia, que realiza a diario a predición do tempo para Galicia, a Fundación Pública Galega de Medicina Xenómica, que produce investigacións e prové servizos clínicos en base a análises xenómicas para o Sergas, e grupos de investigación das universidades que teñen como liñas de investigación, por exemplo, o descubrimento temperán de fármacos ou a monitorización xenómica da epidemia por SARS-CoV-2 en Galicia.