O CITIC celebra a cuarta edición do Congreso XoveTIC

O Centro de Investigación TIC (CITIC) da Universidade da Coruña acolle estes días (xoves 7 e venres 8 de outubro) a cuarta edición do Congreso XoveTIC, que está destinado a persoal investigador júnior para presentar as súas comunicacións no ámbito das Tecnoloxías da Información e as Comunicacións (as TIC). O obxectivo do congreso é construír un espazo de encontro para o debate científico e contribuír á formación dos novos investigadores e investigadoras.
O evento celebrarase en formato híbrido, con retransmisións mediante a web do congreso e a través da canle do CITIC en Youtube. Presentaranse un total de 62 traballos e terán lugar dúas conferencias plenarias, a cargo da directora da Área de Tecnoloxía da UPF Barcelona School of Management, Ana Freire, e o membro do Comité Asesor de Directores do INESC TEC de Porto e profesor da Universidade do Minho, Rui Carlos Oliveira.
Entregaranse cinco premios por un valor de 300 euros cada un ás comunicacións orais mellor valoradas por parte do comité científico, atendendo á súa calidade, excelencia e orixinalidade.
As entidades financiadoras dos premios son o Clúster TIC de Galicia; o Colexio Profesional de Enxeñaría en Informática de Galicia (CPEIG); o Instituto Tecnolóxico de Galicia (ITG); a Cátedra Aldaba WIB, a Cátedra UDC-Everis en Transformación Dixital e a Cátedra R en Ciberseguridade; e a Fundación CITIC de Galicia.
Programa actividades presenciais para este venres
-12:45 h – 13:30 h. Sesión plenaria: Rui Carlos Oliveira, membro do Comité Asesor de Directores do INESC TEC de Porto e profesor da Universidade do Minho: Emergency Research – Help fighting a pandemic.
-13:30 h – 14:00 h. Entrega de premios.
-14:00 h – 14:30 h. Acto de clausura a cargo do reitor da Universidade da Coruña, Julio Abalde Alonso, e o director do CITIC, Manuel F. González Penedo.