O CITIC celebrará o IV Congreso XoveTIC o 7 e 8 de outubro
venres, 17 de setembro do 2021
O CITIC celebra os
próximos 7 e 8 de outubro a cuarta edición do Congreso XoveTIC, un
evento científico destinado ao persoal investigador júnior.
Presentaranse un total de 60 traballos no ámbito das TIC e tamén
terán lugar dúas conferencias plenarias, ofrecidas pola directora
da Área de Tecnoloxía da UPF Barcelona School of Management, Ana
Freire, e o membro do Comité Asesor de Directores do INESC TEC de
Porto e profesor da Universidade do Minho, Rui Carlos Oliveira.
A inscrición ao congreso é gratuíta e pode
formalizarse na páxina web xovetic.citic.udc.es.
Este evento científico
está destinado ao persoal investigador júnior (predoutoral e
posdoutoral) para presentar comunicacións orais ou pósteres das
súas investigacións no ámbito das TIC (Tecnoloxías da Información
e a Comunicación). Ademais, tamén están previstas conferencias
plenarias e obradoiros de formación.
Segundo explica o CITIC, o XoveTIC é “un
congreso xenuíno que se diferencia da maioría dos eventos análogos
que se celebran en España no ámbito das novas tecnoloxías, nos
cales se reúnen investigadores sénior con anos de experiencia”.
Pola contra, o XoveTIC preséntase como “o punto de partida de
novas investigacións e proxectos que impliquen cambios disruptivos
na sociedade e na tecnoloxía tal e como actualmente as coñecemos”.