O CITIC mostra as súas tecnoloxías ao alumnado do Grao en Intelixencia Artificial da UDC

xoves, 2 de marzo do 2023 S. P.

Na mañá deste 1 de marzo visitou a sede do CITIC (Centro de Investigación TIC) un grupo de 30 alumnos e alumnas de primeiro curso do Grao en Intelixencia Artificial da UDC, acompañados pola súa profesora e membro do Comité de Dirección do CITIC Adriana Dapena. O alumnado foi recibido polo subdirector do centro, Javier Pereira, quen realizou unha breve presentación do mesmo e faloulles das súas principais liñas de investigación.
A continuación, o grupo visitou o Demostrador Tecnolóxico no que se lles mostraron diferentes proxectos do ámbito da Intelixencia Artificial como robots, dispensadores autónomos de medicamentos en plantas de UCI e drons. Tamén puideron coñecer o funcionamento dun casco de electroencefalografía para o estudo da actividade cerebral desenvolto por Adriana Dapena e o seu equipo investigador.
Posteriormente, visitaron o Centro de Proceso de Datos e o laboratorio de Realidade Virtual. Neste último, o investigador Manuel Lagos realizou unha demostración da plataforma Virtuix Omni Prol que permite desprazarse de forma ilimitada nunha contorna de Realidade Virtual e emprégase no CITIC para a práctica de habilidades físicas e cognitivas en persoas con discapacidade.

PUBLICIDADE