O CITIC potencia a súa investigación no ámbito da saúde
martes, 16 de maio do 2017
- Presentación da plataforma eDSalud, impulsada polo CITIC da Coruña
O CITIC
(Centro de Investigación TIC), amais de ser un referente galego
e estatal na investigación e impulso de novas tecnoloxías da
información, é un referente especifico en eSaúde. En palabras do
centro, este interese pola atención médica e as tecnoloxías da
saúde remóntase aos comezos mesmos do CITIC. Os motivos? Pois, en
primeiro lugar, o CITIC menciona os beneficios directos que redundan
na calidade de vida dos cidadáns. A isto hai que engadir o feito de
que a eSaúde constitúa, nas súas palabras, un dos terreos máis
prometedores no ámbito do I+D+i para os vindeiros anos. A
continuación damos conta dalgúns destes fitos tecnolóxicos do
CITIC, que veñen de culminar co
proxecto eDSalud, unha revolucionaria tecnoloxía de telemedicina
que rompe fronteiras e derruba atrancos no ámbito da atención e os
diagnósticos en tempo real.
Ferramentas de apoio ao diagnóstico no ámbito da
oftalmoloxía (proxectos Sirius e Ideas), a integración do TIC nos
colectivos de persoas con diversidade funcional (proxecto InTIC),
proxectos para a construción de mapas de sono para a obtención dun
diagnóstico da actividade cerebral (proxectos Miasoft e Hypnogram)
ou a creación dun modelo de saúde participativa en persoas maiores
utilizando o TIC (proxecto GeriaTIC) foron sumando experiencia a esta
liña de investigación do CITIC. eDSalud foi o último proxecto
presentado neste eido. Trátase dunha innovadora plataforma de
telemedicina que permitirá, no prazo de dous anos, levar a cabo
diagnósticos en tempo real con especialistas internacionais
relacionados con radioloxía, cardioloxía, oftalmoloxía e
dermatoloxía.
O Ministerio de Economía e Competitividade do
Goberno de España apoiou o seu desenvolvemento grazas ao
financiamento por valor de máis dun millón de euros, no marco do
Programa Estatal de I+D+i Retos 2016, e está co-financiado con
Fondos FEDER.
Unha das vantaxes que carrexará esta plataforma é
“que dará cobertura a pacientes que están en zonas que non teñen
acceso a grandes hospitais”, segundo nos conta Marcos Ortega,
investigador principal do CITIC, engadindo que eliminará o concepto
“horario”, pois ao contar con especialistas en calquera parte do
mundo “sempre haberá un que estea a traballar no intre urxencia”.
A bolsa de especialistas internacionais necesaria
achégaa Atrys Health, compañía especializada en servizos de
diagnóstico por imaxe en liña, que lidera o proxecto, no que tamén
participan outros actores do sector tecnolóxico á parte do CITIC,
como o Centro Tecnolóxico de Telecomunicacións de Galicia
(Gradiant) e a compañía VITEL, S.A.
O diferencial de eDSalud, aloxado na nube, é a
incorporación de ferramentas de software (algoritmos e machine
learning) para apoiar aos médicos na precisión dos seus
diagnósticos, ademais de facilitar a colaboración entre
especialistas e as segundas opinións clínicas.
O feito
de colaborar con Atrys Health neste proxecto propiciou que o CITIC se
incorporara á Asociación Saúde Dixital (ASD), converténdose no
único centro de I+D+i que é socio corporativo da entidade. “Un
centro tecnolóxico en TIC con actividade intensiva en tecnoloxías
relacionadas coa Saúde, como é o CITIC, pode achegar coñecemento,
estrutura e profesionais altamente cualificados”, comenta Víctor
G. Rumayor, director de I+D+i de Atrys Health e membro da xunta
directiva da asociación, que ten como obxectivo prioritario achegar
coñecemento na prevención e promoción da saúde, facendo un uso
exhaustivo dos avances da tecnoloxía e a súa cada vez maior
accesibilidade, obxectivo que encaixa coa misión do CITIC neste
campo.
Dentro da asociación atópanse empresas de renome
internacional, como DKV, InterSystems e Indra, feito que permitirá
ao CITIC establecer contacto con todo tipo de profesionais que están
a innovar no ámbito do TIC e a saúde, propiciando a posibilidade de
compartir ideas, proxectos e experiencias.
Unha das primeiras accións levadas a cabo como
socio corporativo da ASD foi a presentación do CITIC na iniciativa
ELAN Network celebrada en Costa Rica. ELAN Network é un programa
europeo que apoia e diversifica a presenza económica de Europa en
Latinoamérica e a demanda de coñecemento e tecnoloxía innovadora
europea por parte de Latinoamérica.
Enmarcada no seu relatorio TIC e Big Data como
eixo transversal de desenvolvemento de proxectos conxuntos,
Lorena Muñoz, vogal da xunta directiva da asociación, encargouse da
presentación, e salientou a importancia de asistir a este tipo de
eventos xa que “o obxectivo é tender pontes entre centros europeos
e latinoamericanos e sentar os alicerces para configurar proxectos de
investigación internacionais en ámbitos tan interesantes como o Big
Data aplicado a saúde”.
Proxectos e asociacións como estas marcan a
aposta continua do CITIC na súa liña estratéxica no eido do
medicamento.