O Campus de Ferrol acolle un curso intensivo sobre a Industria 4.0

Preto de 40 estudantes de grao, de mestrado e de programas de doutoramento procedentes de Croacia, Serbia, Romanía e de Letonia participan, ao longo de toda esta semana, no Campus Industrial de Ferrol, nun Programa Intensivo Combinado (en inglés, Blended Intensive Programme - BIP), un curso de formación no que afondarán nas principais tecnoloxías da Industria 4.0 e na súa aplicación nas denominadas probas experimentais ou, o que é o mesmo, no método que emprega, a pequena escala, o persoal investigador para validar unha hipótese ou teoría.
A Universidade da Coruña (UDC) coordina esta iniciativa de innovación docente, enmarcada dentro do Programa Erasmus+, na que tamén participan a University of Zagreb (Croacia), a University of Belgrade (Serbia), a Tampere University (Finlandia), a Vidzeme University of Applied Sciencies (Letonia), así como a National University of Science and Technology Politehnica Bucharest e a Universitatea Petrol-Gaze Din Ploiesti, ambas as dúas de Romanía.
Logo de realizar unha formación previa en liña, do 26 de xuño ao 3 de xullo, o alumnado participante foi recibido este luns 7 de xullo no Salón de Actos Concepción Arenal do Campus Industrial de Ferrol, pola vicerreitora do Campus de Ferrol e Responsabilidade Social, Ana Ares; polo adxunto de Mobilidade e Convenios da Vicerreitoría de Titulacións e Internacionalización, Bruno Casal; polo director científico do Centro de Investigación en Tecnoloxías Navais e Industriais (CITENI), Armando Yáñez; e máis polo director do Campus Industrial da Universidade da Coruña (UDC), Marcos Míguez.
Ao longo desta semana, o alumnado realizará dous módulos comúns centrados na fabricación aditiva, tamén coñecida como impresión 3D, e na sensórica e adquisición de datos a través da plataforma de creación electrónica de código aberto Arduino. Logo disto, poderán elixir entre afondar nos métodos experimentais empregados no eido da arquitectura naval, no da enxeñaría mecánica, no da robótica submarina ou no do desenvolvemento de polímeros.
Toda a formación, tanto teórica como práctica, será impartida por persoal docente e investigador da Universidade da Coruña (UDC), da Università degli Studi di Napoli Federico II (Italia), da Universidade do Minho (Portugal), da Tampere University (Finlandia) e da University of Belgrade (Serbia) na Escola Politécnica de Enxeñaría de Ferrol (EPEF) e no Centro de Investigación en Tecnoloxías Navais e Industriais (CITENI).
A maiores, a proposta formativa deste Programa Intensivo Combinado inclúe cadansúa visita ao Centro de Investigación en Tecnoloxías da Información e as Comunicacións (CITIC) e ao Centro de Innovación Tecnolóxica en Edificación e Enxeñería Civil (CITEEC), situados no Campus da Coruña, e á Torre de Hércules, símbolo da cidade. Tamén coñecerán boa parte dos laboratorios do Centro de Investigación en Tecnoloxías Navais e Industriais (CITENI), emprazado no Campus Industrial de Ferrol, así como os principais lugares de interese turístico da cidade departamental e varias das praias da súa contorna.