O Campus de Ourense acolle a gravación da webserie Destapando Casares
martes, 25 de xuño do 2019
O
Campus de Ourense está a acoller a gravación dunha webserie
de intriga que reflicte o poder que poden achegar adquirir certos
usuarios das redes sociais cando manexan información privada sobre
as persoas. Estamos
a falar de Destapando Casares, que se filma no edificio
Xurídico-Empresarial do Campus e que está enmarcada na celebración
do Taller Celanova Plató de Ficción (Curso de Medios
Audiovisuais de Celanova da programación de extensión universitaria
do Campus de Ourense). A obra consiste nunha ficción transmedia:
alén da webserie en si mesma, tamén hai un blog, podcasts e
presenzas propias en Instagram e en Tinder.
Á
fronte da coordinación do obradoiro e da webserie atópase o
profesor do campus pontevedrés Paulino Pérez. Amais, Destapando
Casares conta co patrocinio das vicerreitorías dos campus de
Ourense e Pontevedra, a Área de Normalización Lingüística,
AGADIC, a Deputación de Ourense, a Fundación Carlos Casares,
Gmprovideo e o Festival de Cine Internacional de Ourense.
Destapando
Casares, sinala o profesor Paulino Pérez, “é un proxecto que
naceu coa intención de combinar a produción dunha curtametraxe co
mundo das redes sociais e plataformas dixitais”. Así, detalla, a
serie constará de cinco episodios duns cinco minutos cada un, que
serán emitidos ao mesmo tempo a través das diferentes plataformas.
En
Instagram, apunta Paulino Pérez, “cada un dos personaxes terá un
perfil e empregaremos os stories para subir material inédito
da rodaxe, así como pequenas entrevistas aos actores interpretando o
seu personaxe ou respondendo a preguntas sobre o episodio”.
En
Tinder os personaxes principais terán un perfil como se realmente a
estivesen utilizando para atopar amigos ou parella. “A intención é
que o público atope os nomes e fotos dos actores e vexa ao abrir o
perfil que se trata dunha serie online”, afirma o profesor.
O
proxecto ten como protagonistas a tres estudantes e un profesor que
toman a iniciativa de investigar, antes de que remate o curso, o que
está a acontecer cunha conta de Instagram e cales son os segredos do
campus que ameaza revelar.
O
guión da serie e contidos web desenvolvéronse nos últimos catro
meses. Na gravación participan 16 estudantes do Grao en Comunicación
Audiovisual do Campus de Pontevedra.