HACKatHOME seleccionou tres proxectos de tecnoloxías postCOVID
venres, 3 de xullo do 2020
Finalmente
xa sabemos cales
son os proxectos seleccionados no HACKatHOME, o hackathon
virtual organizado pola axencia autonómica GAIN durante catro
xornadas, xuntando persoas de diferentes ámbitos innovadores, co
apoio de empresas e centros tecnolóxicos e universidades, para
desenvolver solucións innovadoras que dean resposta ás necesidades
xeradas polo coronavirus na industria, o comercio e o emprego. Un
dispositivo para minimizar o contacto con superficies como pantallas
informativas ou máquinas de vending, un supermercado online
que mellore a experiencia de compra a través da simulación en 3D e
unha aplicación para organizar feiras virtuais son os tres proxectos
seleccionados.
Levarán
un premio de 1.000 euros e o asesoramento e seguimento personalizado
dos proxectos durante un período de seis meses polas entidades
organizadoras e colaboradoras.
Participantes de todo o eido estatal
Máis
de medio cento de persoas procedentes principalmente de España, pero
tamén doutros países como Reino Unido ou Polonia, traballaron en
equipo durante catro xornadas para dar resposta a cinco retos
definidos conxuntamente pola Administración e as entidades
colaboradoras.
Das
23 ideas presentadas chegaron á fase final 16, nas que estaban
representados os cinco retos: solucións de baixo contacto para
minimizar o contacto de traballadores e clientes co virus nos espazos
de traballo; seguridade dos espazos comerciais; solucións de
teletraballo; achegas para reducir as necesidades de desprazamento da
industria; e propostas para coordinar equipos de traballo no novo
contexto de separación física.
Proxectos seleccionados
- Francisco Conde, conselleiro de Economía, na presentación do hackathon
O
equipo TouchLess Technologies, formado por Xabier Crespo Álvarez;
Luis Miranda Acebedo e Daniel Pérez Milian da empresa viguesa
Scrobotics e Pedro José González González e Rafael R. Gerardo
Weisz da empresa madrileña Ubiquotechs, asesorados por Iago Soto da
empresa Quobis, presentou unha proposta ao reto de solucións de
baixo contacto: SC Touchless, un dispositivo deseñado para minimizar
o contacto con superficies coas que decote interactuamos, como por
exemplo as pantallas de información ou as máquinas de vending.
O
equipo Virtual Market, formado por Manuel Canedo Tabarés de Santiago
de Compostela; Amanda Cifuentes Dengra de Murcia e Alba Arrojo
Centeno de Lugo, e asesorados por Santi Vidal, María Luaces e
Estefanía Montero da empresa Kelea, responderon ao reto Repensando
a venda ao público. A partir dunha análise dos factores que
inflúen no volume de ventas dos supermercados online, desenvolveron
un prototipo de supermercado virtual que mellora a experiencia de
compra satisfacendo necesidades como a de percepción visual,
interacción social, etc.
Por
último, o equipo FEDI, composto por Pablo Boullosa García de
Cambre; Jacobo Fiaño Salinas de Oleiros e Jesse Anthony Lago López
de Muros e coordinados por Andrés Gómez do CESGA (Centro de
Supercomputación de Galicia) presentaron unha solución ao reto dun
novo comercio, ao abeiro do cal desenvolveron unha aplicación que
serve como solución estándar para organizar feiras virtuais en 3D
de diferentes características, ofrecendo múltiples opcións de
personalización.
Colaboración
Na organización do evento a Axencia Galega de Innovación da Xunta de Galicia contou coa colaboración de preto de 40 entidades que participaron na validación dos retos, na difusión do evento, na mentorización dos proxectos e no comité de avaliación. Entre os colaboradores cóntanse clústeres e asociacións empresariais de Galicia (Clúster TIC Galicia, Aclunaga, Cointega, Bioga, Clúster Alimentario de Galicia, Ceaga, Federación Galega de Comercio, Clúster da Madeira, DiH DATAlife e Clúster Saúde Galicia), empresas (Grupo Nueva Pescanova, Imatia, Zendal, Televes, Mestrelab Research, Quobis, PSA, Kelea e El Corte Inglés) as tres universidades galegas (Universidade de Vigo, Universidade da Coruña e Universidade de Santiago de Compostela) e centros de coñecemento (Citic, Citius, Itmati e atlanTTic), os centros tecnolóxicos (Instituto Tecnológico de Galicia, Gradiant, Atiga, CTAG, Fedit, Aimen e Cetim), outras organizacións e axentes (Cesga e Colexio Oficial de Enxeñeiros Industriais de Galicia), así como distintos departamentos da Administración autonómica.