O ITG reuniu a máis de cen expertos da industria dron de toda Europa

Esta semana (mércores e xoves) a sede da Coruña do ITG (Instituto Tecnolóxico de Galicia) acollía un dos principais encontros profesionais sobre xestión do tráfico aéreo de aeronaves non tripuladas. O dito workshop, que reuniu a máis de cen expertos da industria dron de toda Europa, inauguraba os encontros de traballo do proxecto europeo U-ELCOME que quer promover a introdución do U-Space na UE, feito que supón o antecedente das primeiras demostracións (que serán en quince localizacións de España, Italia e Francia).
Indo ao encontro, dicir que contou coa presenza de expertos de Reino Unido, Irlanda, Países Baixos, Bélxica, Dinamarca, Suecia, Polonia, Francia, Italia e España, que se dividiron en varias sesións de traballo para analizar aspectos como o desenvolvemento tecnolóxico, a seguridade, procedementos ou viabilidade económica do U-Space.
Estas sesións foron impartidas por representantes da Organización Europea para a Seguridade da Navegación Aérea, Eurocontrol; a enxeñaría e consultoría INECO, adscrita ao Ministerio de Transportes, Mobilidade e Axenda Urbana; os xestores de navegación aérea de España (ENAIRE), Italia (ENAV) e Bélxica (SKEYES) e empresas como a francesa Thales ou a norteamericana Collins Aerospace.
Os participantes asistiron a un programa de sesións temáticas, de 45 minutos de duración e impartidas en paralelo, en cuestións moi específicas derivadas da normativa da Unión Europea sobre U-Space, o programa da UE para a integración eficiente e segura das aeronaves non tripuladas no espazo aéreo europeo nunha plataforma unificada e regulada polas autoridades nacionais para xestionar o tráfico aéreo. ITG, único centro tecnolóxico de Galicia presente neste consorcio europeo actuou como anfitrión do encontro e tamén como provedor de servizos de U-Space e centro demostrador con infraestruturas específicas para testar soluciones comerciais e pre-comerciais.
Como resumo do encontro, dicir que U-ELCOME elaborará un manual para a implantación do U-Space baseado na experiencia adquirida en toda Europa e para acadar o éxito do U-Space será preciso traballar na realización de despregamentos harmonizados que posibiliten unha introdución homoxénea en Europa do U-Space, creando un único mercado, permitindo a interoperabilidade entre os distintos sistemas; avaliar os riscos dos espazos aéreos e definir metodoloxías, facendo despregaduras seguras de zonas U-Space, entre outros aspectos.