O Messenger de Facebook estrea versión para mercados emerxentes

A primeiros do ano pasado Facebook lanzou unha aplicación para países con conexións móbiles precarias, Facebook Lite, que non só fai un reducido uso das tarifas de datos, senón que tamén deixa unha pegada máis reducida no smartphone, ocupando menos espazo de almacenamento e recursos (ou sexa, que tamén tería un impacto menor na autonomía do móbil) e continuando na mesma liña presentan agora Messenger Lite, unha aplicación para Android dirixida a mercados nos que as conexións á Rede aínda son bastante lentas e onde predominan os smartphones de prestacións moi básicas.
Messenger Lite permite intercambiar textos, fotografías e ligazóns con calquera que use a mesma aplicación ou tamén o Messenger normal de Facebook, co que buscan incrementar a base de usuarios desta ferramenta que cada día acada unha cota de mercado máis próxima á de WhatsApp (de xeito, en certos mercados é a ferramenta de mensaxería instantánea líder).
Esta nova aplicación ocupa menos de 10 MB, instálase rapidamente e tamén entra en funcionamento dun xeito áxil, e procura manter as funcións centrais do Messenger, como a mensaxería, o intercambio de fotografías e ligazóns e incluso o uso de adhesivos (stickers), deixando de lado funcionalidades como as conversas de voz, as videoconferencias e outras características avanzadas que non se considerarían imprescindibles.
Polo momento Messenger Lite está só dispoñible en Quenia, Tunisia, Malaisia, Sri Lanka e Venezuela, aínda que está previsto que nos vindeiros meses chegue a moitos outros países.