O Pavillón de España en MWC bate o seu récord con máis de 10.000 visitantes presenciais e 7.000 virtuais

O Pavillón de España de Red.es, no que participou a empresa galega Galvintec (Grupo Alvariño), bateu o seu récord de asistencia marcado na anterior edición de MWC cun incremento do 25% no número de visitantes. Máis de 10.000 persoas pasaron polo espazo, concibido como “un punto de encontro para o debate e a presentación de innovacións por parte de empresas expositoras, institucións e expertos do sector tecnolóxico”.
Así, aos visitantes presenciais únense aqueles que accederon de maneira virtual á intensa axenda de actividades retransmitida no set de presentacións, ben a través da web específica do Pavillón ou pola canle oficial de Red.es en Youtube. O acceso á web oficial acumulou un 50% de incremento de usuarios únicos respecto ao ano pasado e un tempo medio de permanencia superior aos 10 minutos. Adicionalmente ás 10.000 visitas, por tanto, máis de 7.000 usuarios máis accederon aos contidos do Pavillón de maneira virtual.
En total, máis de 60 contidos como mesas redondas, paneis institucionais, roldas de prensa, pitches e relatorios sucedéronse nunha axenda ininterrompida, que congregou a un centenar de relatores procedentes de diferentes sectores de especialización do sector dixital e tecnolóxico.
A iso únense as dinámicas de networking internacional celebradas no marco do Pavillón, coa recepción de delegacións empresariais procedentes de Colombia, Xapón, Reino Unido, Italia, Quebec, Francia e Grecia, así como os circuítos temáticos sobre Intelixencia Artificial ou Big Data, nos que os participantes puideron coñecer de primeira man as propostas de valor das empresas expositoras. En total, 10 eventos que congregaron a uns 120 visitantes internacionais e que consolidaron ao Pavillón de España no seu rol de xerador de sinerxías e oportunidades de negocio.
Os expositores calculan que a súa presenza no Pavillón les permitirá xerar negocio por valor de 12,5 M €. As 45 empresas coexpositoras desenvolveron unha intensa axenda de negocios aproveitando o marco e a atracción que xera o Pavillón, e participaron en máis de 1.500 reunións con máis de 2.000 contactos profesionais, dos que máis de 500 serán cualificados.