O coche autónomo e conectado que percorrerá as estradas españolas colle impulso dende Vigo

O Auditorio Mar de Vigo acolleu este 22 de setembro a primeira xuntanza do proxecto ARTUS, Constelación de Laboratorios para a Mobilidade Conectada. Foi un acto dirixido e coordinado pola Zona Franca de Vigo, no que participaron representantes das administracións impulsaras e das empresas implicadas para desenvolver dar o empurrón definitivo ao coche autónomo e intelixente no ámbito estatal.
O Ministerio de Industria, a través da súa Dirección Xeral de Industria, convocou ás entidades públicas e ás empresas privadas interesadas en impulsar o proxecto tractor do vehículo conectado nunha reunión organizada pola Zona Franca de Vigo. O eixo da xuntanza foi o proxecto ARTUS, liderado por Cellnex.
Ao encontro asistiron as empresas que manifestaron interese en participar e coñecer o plan para impulsar o vehículo do futuro.
En total, participaron 15 administracións (a Generalitat de Catalunya, a Generalitat Valenciana, o Goberno de Aragón, a Xunta de Castela e León e a Xunta de Galicia/IGAPE, Concellos de Castellolí, Zaragoza, Valladolid e Vigo, a Deputación de Pontevedra, así como os Consorcios da Zona Franca de Barcelona e a Zona Franca de Vigo e o Porto de Alacante) ás que se uniron a Dirección Xeral de Tráfico (DXT) e o Instituto Nacional de Ciberseguridade (INCIBE), ambas entidades cun papel estratéxico pola importancia da seguridade viaria e a protección tecnolóxico-dixital, como “factores críticos do proxecto”.
Ademais, participaron as 21 empresas e entidades do consorcio privado que lidera Cellnex Telecom, co apoio de Grant Thornton: Renault, CEGASA, ANFAC, Sernauto, Fundación Ibercaja, Fundación ONCE, CTAG, Idiada, CTTC, BSC-CNS, IThinkUPC, Parcmotor Castellolí, Enide Solutions, Optare 5G, Nearby Computing, Madcoms Networks, Eurocybcar, Project, e S2 Grupo.
Finalmente, contouse coa presenza do Grupo Stellantis, SEAT, Gestamp, ZF_Dalphi Metal, Magna Seating, Borgwarner Emission Systems Clúster de Automoción de Galicia (CEAGA) e ASIME (Asociación de Industriais Metalúrxicos de Galicia.)
O Proxecto ARTUS ten como obxectivo deseñar, probar e homologar tecnoloxías de futuro nos laboratorios de probas que se construirán para ese efecto, creando nun futuro un centro de certificación e homologación. Con este plan, España quere acadar “unha clara vantaxe competitiva no ámbito científico e industrial co beneficio que isto reporta á sociedade: crecemento económico e de emprego, atracción de investimento, así como, mellora na seguridade e apoio no proceso de descarbonización”. Neste sentido Zona Franca de Vigo e CTAG concorren no programa co proxecto Atlantrack, un centro de validación de vehículos eléctricos e autónomos.
O director de ARTUS en Cellnex Telecom, Fernando Brea, destacou que “o proxecto creará unha rede de laboratorios de mobilidade que serán clave no desenvolvemento das futuras infraestruturas viarias de telecomunicacións, base para a mobilidade conectada. Cellnex Telecom lidera este proxecto co obxectivo de desenvolver as tecnoloxías necesarias para o despregamento destas infraestruturas de forma coordinada co sector da automoción e a mobilidade”.