O delegado da Xunta salienta os fitos do CITIC en materia de Intelixencia Artificial

O subdirector do CITIC, Javier Pereira; a concelleira do Concello da Coruña, Esperanza Peñalosa; o delegado territorial da Xunta na Coruña, Gonzalo Trenor; o vicerreitor de Política Científica, Investigación e Transferencia da UDC, Salvador Naya; e o director do CITIC, Manuel F. González Penedo.

O delegado territorial da Xunta na Coruña, Gonzalo Trenor, visitou este 26 de abril as instalacións do Centro de Investigación TIC da Universidade da Coruña (CITIC), no Campus de Elviña, para coñecer algúns dos avanzados proxectos en Intelixencia Artificial que se están a desenvolver no centro. Nas súas palabras, o CITIC “é un éxito da colaboración entre a Universidade, a sociedade, a Administración e o tecido empresarial”.
O vicerreitor de Política Científica, Investigación e Transferencia da UDC, Salvador Naya, o director e o subdirector do CITIC, Manuel F. González Penedo e Javier Pereira, respectivamente, mostraron ao delegado da Xunta diferentes investigacións do centro centradas na Intelixencia Artificial, área na que o CITIC é referente na comunidade galega. O delegado territorial da Xunta estivo acompañado pola concelleira do Concello da Coruña, Esperanza Peñalosa.
Trenor destacou que o CITIC é quen de “marcar a diferencia con respecto doutros centros” e está a definir “o camiño da investigación e da colaboración con empresas para sacar adiante proxectos”. Na súa opinión, “todos os coruñeses e os galegos podemos sentirnos orgullosos deste centro”, ao que agoirou un futuro “moi prometedor”.
Trenor interesouse polos avances dalgúns dos proxectos máis punteiros do centro e tivo a oportunidade de probar dispositivos de Realidade Virtual na sala de demostradores do centro, analizando en primeira persoa a experiencia de usuario.
Cabe destacar que o CITIC recibiu financiamento directo por parte da Xunta por máis 2,2 millóns de euros, dende o ano 2019 ata 2022, o cal constata a importancia que desde o Goberno galego se lle está dando ao centro.