O emprendemento galego en ciberseguridade colle impulso en Vigo o 22 de xaneiro

venres, 10 de xaneiro do 2020 Fernando Sarasketa

O capítulo galego do ISMS Forum Spain, presentado nos seus detalles o pasado mes de novembro, comezou 2020 a pleno rendemento. Proba disto é a xornada de innovación e emprendemento en ciberseguridade que organiza o capítulo o vindeiro 22 de xaneiro na sede de Abanca en Vigo (nos números 1-3 da avenida de García Barbón), en horario de 9.00 a 12.00 horas. O obxectivo será xuntar recursos, traballar en común e visualizar e impulsar novas propostas de emprendedores en materia de protección tecnolóxica e salvagarda da información e dos sistemas.
A presentación correrá a cargo de Roberto Baratta, director de continuidade de negocio e protección de datos en Abanca, así como membro principal de Global ISMS Forum; e Susana Rey, responsábel de protección de datos na operadora galega de cable R e, tamén, integrante referencial de ISMS Forum Galicia. Durante a xornada, exporanse algunhas das iniciativas máis relevantes no sector e coñeceranse os proxectos da man de startups como AuthUSB, DirectDump, ImprOTech, Redbee, DooingIT ou Blackarrow.
A estrea oficial de novembro
O capítulo galego do ISMS Forum presentou en novembro do ano que vimos de deixar atrás a súa liña principal de actuación: promover o desenvolvemento, coñecemento e cultura da seguridade da información e actuar en beneficio de toda a comunidade implicada no sector. ISMS Forum Spain ten xa a máis de 230 empresas asociadas e máis de 1.200 profesionais asociados. A Asociación Española para o Fomento da Seguridade da Información, ISMS Forum Spain, unha organización sen ánimo de lucro fundada en xaneiro de 2007, concibiuse para promover o desenvolvemento, coñecemento e a cultura da Seguridade da Información.

PUBLICIDADE