Os novos Honor Magic3 levarán por bandeira as súas cámaras e os servizos de Google

Dende que Honor é unha compañía independente de Huawei (a falta de liquidez forzou a Huawei a vender a marca Honor a un consorcio chinés) faltáballe demostrar que tiña auténticos móbiles insignia en vez de versións económicas dos móbiles de Huawei, e por fin conségueo cos novos Honor Magic3, familia de móbiles que funcionan con procesador Qualcomm Snapdragon de alta gama, acceso á tenda de aplicacións de Google e grandes cámaras, elementos chaves para unha traxectoria de futuro.
O móbil básico da nova serie sería o Honor Magic3, con procesador Qualcomm Snapdragon 888, 8 GB de RAM, 128/256 GB de almacenamento interno e batería de 4.600 mAh (con carga rápida de 66 watts), así como unha pantalla AMOLED de 6,67 polgadas, HDR10+ e 120 Hz de velocidade de refresco cun orificio para unha cámara frontal de 13 Mpíxeles. Sairá á venda por a partir de 899 euros.

Logo temos o Honor Magic3 Pro, que xa ten opcións con 8/12 GB de RAM, 256/512 GB de almacenamento interno, altofalantes estéreo IMAX Enhanced, resistencia IP68, recoñecemento facial e batería de 4.600 mAh con carga rápida de 66 watts á que habería que engadir carga rápida sen fíos a 50 watts. Sairá á venda por a partir de 1.099 euros.
E, finalmente, o Honor Magic3 Pro+, que contaría cun procesador Qualcomm Snapdragon 888+, 12 GB de RAM e 512 GB de almacenamento interno, elevando o seu prezo até os 1.499 euros.
Esta familia de móbiles sería idéntica na parte frontal, de xeito que entre versións muda a súa configuración de procesador, memoria e almacenamento, así como a súa cámara traseira. No caso do Magic3 a cámara traseira ten un sensor CMOS de 50 Mpíxeles, unha cámara monocromo de 64 Mpíxeles e un ultra grande angular de 13 Mpíxeles, mentres que o Magic3 Pro contaría tamén cun teleobxectivo de 3,5x e 64 Mpíxeles capaz de realizar un zoom híbrido de 10x e dixital de 100x.

O móbil máis impresionante a nivel de cámara sería o Magic3 Pro+, cunha cámara principal de 50 Mpíxeles cun sensor de grande tamaño, un sensor monocromo de 64 Mpíxeles, un ultra grande angular de 64 Mpíxeles e un teleobxectivo de 3,5x e 64 Mpíxeles. Ou sexa, que aínda que o Magic3 Pro e o Magic3 Pro+ pode parecer que teñen a mesma configuración de cámara, realmente non é así, xa que a cámara principal do Pro+ ten o dobre de tamaño de sensor (sendo tamén de maior tamaño o resto de sensores), o que consegue fotografías coa mesma resolución pero con moita mellor captación da luz, o que tradúcese en imaxes de maior calidade, especialmente en interiores e condicións de baixa luminosidade.
Falta agora que anuncien cando chegarán estes impresionantes smartphones ao noso territorio, e a acollida que dará ao público a móbiles de tal gama baixo a marca Honor.