Os novos episodios de Game of Thrones retransmitiranse simultaneamente en 170 países

mércores, 11 de marzo do 2015 Marcus Fernández

A canle de televisión por cable HBO está a dar un importante pulo á súa política de distribución de contidos audiovisuais, e tras presentar o seu servizo HBO NOW durante a keynote de Apple desta semana, sorprenden agora cun anuncio especialmente relevante: os novos episodios da serie Game of Thrones estrearanse simultaneamente en 170 países e territorios de todo o mundo nos que a canle ten presenza, coincidindo coas emisións norteamericanas que se iniciarán o vindeiro 12 de abril.
Esta retransmisión global simultánea terá lugar durante os 10 episodios da quinta tempada da ficción televisiva, e parece responder directamente ao feito de que a serie Game of Thrones leva anos liderando as descargas a través de plataformas de intercambios de ficheiros como BitTorrent, xa que os seareiros da serie non están dispostos a agardar varios meses para poder ver os último episodios da serie dobrados á súa lingua ou, simplemente, emitidos a través de canles locais con certo retraso, o que pode supor estragar moitas das sorpresas que agochan os episodios, xa que estes tamén teñen moito impacto nas redes sociais, o que fai que non seguir a serie ao día faga imposible evitar spoilers moi importantes como aconteceu na anterior tempada coa voda vermella, que converteuse nun tema do momento a nivel mundial.
Game of Thrones é a serie máis popular da historia da HBO, e parece ser tamén a serie cun maior impacto na Internet, xa que o ano pasado foi a máis buscada en Google, á vez que tamén se converteu na serie máis comentada en Facebook. Parece así innegable que esta franquía é unha baza moi importante para que a HBO poida conseguir unha posición de peso a nivel mundial e consiga negociar acordos con partners internacionais que permitan xogadas como o simulcast sen precedentes que preparan para a nova tempada.