Os novos móbiles de Google apostan decididamente pola IA

Esta tarde celebrouse o noveno evento Made by Google para presentar non só novos smartphones e accesorios da familia Pixel, senón tamén funcionalidades baseadas en intelixencia artificial que buscan revolucionar o xeito de relacionarnos coa tecnoloxía.
Os novos móbiles de Google serían o Pixel 9, o Pixel 9 Pro e o Pixel 9 Pro XL, aos que nalgúns territorios acompañará o Pixel 9 Pro Fold (encartable que dá a impresión de que non veremos en España) movidos todos por un novo procesador Google Tensor G4.
En liñas xerais estamos ante uns móbiles que gardan a liña de modelos anteriores, reforzando o seu apartado fotográfico e presumindo de ter o dobre de resistencia que os modelos da anterior xeración.
O Pixel 9 chegará cunha pantalla de 6,3 polgadas, unha cámara traseira dual e 12 GB de RAM, cun prezo de 899 euros, mentres que o Pixel 9 Pro destaca por contar desta volta con dous tamaños: un modelo con pantalla de 6,3 polgadas e outro con pantalla de 6,8 polgadas, respondendo este último ao nome de Pixel 9 Pro XL. O seu prezo parte dos 1.099 euros (a versión de maior tamaño incremento o prezo en 100 euros) e as súas principais melloras son a cámara traseira tripla (con zoom óptico de até 10x) e 16 GB de RAM. Estes móbiles tamén melloran na súa cámara frontal (agora con enfoque automático) e en autonomía (até un 20% maior que a xeración anterior). En todos os casos inclúen 7 anos de actualizacións do sistema operativo e de seguridade.
O procesador Tensor G4 que integran foi deseñado pensando en Google DeepMind, ou sexa, optimizado para correr modelos de intelixencia artificial como Gemini Nano con multimodalidade, de xeito que os smartphones terán máis doado comprender texto, imaxes e son.
De cara á interacción cos usuarios, agora tamén estará dispoñible Gemini Live (para subscritores de Gemini Advanced), que permite interactuar mediante voz coa IA de Google en tempo real e de xeito natural (dun xeito semellante a como se fai coa aplicación de ChatGPT) tanto dende o teléfono como empregando auriculares Pixel Buds.
Con Pixel Studio tamén é posible crear imaxes mediante unha IA xenerativa; Pixel Screenshots pode lembrar as capturas de pantalla que tomemos (extraendo a información das mesmas para poder atopala longo mediante unha rápida busca); e as funcións de cámara continúan mellorando, incorporando desta volta unha interesante novidade que consiste en que o usuario pode tomar unha fotografía de grupo en dúas tomas, de xeito que pode integrarse de xeito automático nunha fotografía con máis xente sen ter que confiar o seu smartphone a un descoñecido.
Dende Google insisten en que as funcións de IA non se limitan ás funcionalidades de alteración e creación de fotografías, ou de xeración de texto, senón que están a redeseñar Android integrando Gemini profundamente, redefinindo o que os móbiles poden facer ao combinar os seus datos coa IA á vez que manteñen a privacidade. Con este tipo de afirmacións parecen querer lanzar a mensaxe de que, aínda que as novidades cheguen inicialmente ao móbiles da gama Pixel, co tempo chegarán á meirande parte de dispositivos con Android.

Vídeo promocional dos novos Pixel 9

Auriculares confortables e con cancelación de ruído avanzada

Os novos teléfonos de Google chegan acompañados por accesorios como os auriculares Pixel Buds Pro 2, que terán un prezo de 249 euros, e que supoñen un importante salto de calidade ao integrar un novo chip Google Tensor A1, que lle permite cancelar o dobre de ruído, conseguir até 30 horas de autonomía coa cancelación de ruído activa e incluso falar con Gemini para pedir axuda empregando unicamente a voz.
Estes auriculares tamén presumen de calidade de son grazas aos seus transdutores de 11 milímetros, aseguran conseguir chamadas telefónicas nítidas grazas o deseño dos seus micrófonos e ao uso da IA de Google e tamén son compatibles con servizo de localización de dispositivos de Google. O seu deseño é un 24% máis lixeiro e un 27% máis compacto que o seu modelo anterior e aseguran que son os auriculares de botón máis confortables do mercado.

Vídeo de presentación dos auriculares Pixel Buds Pro 2

Reloxos con pantallas máis grandes

O outro accesorio presentado hoxe sería o Pixel Watch 3, cun prezo de 399 euros para a versión de 41 milímetros e de 449 euros para o modelo de 45 milímetros, aproveitando os incrementos de pantalla para amosar máis información, mentres que o maior brillo das pantallas tamén mellora a súa visibilidade en exteriores. Funciona con Wear OS 5 e a súa arquitectura promete unha autonomía capaz de durar o día enteiro, podendo activarse cando é preciso un modo de aforro de enerxía capaz de incrementar a autonomía até 36 horas.
Aparte das típicas funcións destinadas ao seguimento da actividade física e a práctica deportiva, o Pixel Watch 3 estrea a función de detección de perda de pulso, ou sexa, que detectaría paradas cardíacas ou respiratorias, ou fallos circulatorios, sobredoses ou envelenamentos, podendo activar como resposta unha chamada aos servizos de emerxencia incluíndo a localización do usuario.
Outra función que tamén pode resultar rechamante é a súa integración domótica, de xeito que o reloxo pode empregarse para, por exemplo, pausar a reprodución ou controlar o volume do que esteamos a ver cun Google TV Streamer, pero tamén serviría para que, cando se sae a facer deporte, se poida recibir directamente o sinal de vídeo dun timbre conectado, para así poder comunicarse remotamente coa persoa que estea na porta do noso fogar (por exemplo, para darlle instrucións sobre onde pode deixar un paquete que vén entregarnos). Tamén hai algúns vehículos que permiten o uso do novo chip de banda ultra larga para poder empregar o reloxo a xeito de chave.

Vídeo de presentación do Pixel Watch 3