Os responsábeis de TokApp lanzan unha ferramenta global de comunicación para empresas, TokApp Direct

xoves, 5 de xuño do 2014 Fernando Sarasketa

A mensaxería instantánea ábrese camiño e os nosos desenvolvedores TIC saben ben do seu potencial de comunicación e interacción. Como por exemplo os desenvolvedores e deseñadores de TokApp, que deron forma coa colaboración da Universidade de Vigo á ferramenta TokApp Direct, unha solución global de comunicación para empresas, clientes e provedores. A idea, basicamente, é facilitarlles a obtención de información de todo tipo de novidades, produtos, ofertas ou eventos, todo isto de maneira gratuíta e baixo a modalidade de subscrición.
Ademais disto, TokApp Direct fornecerá a empresas, autónomos e asociacións a posibilidade de publicitárense adquirindo paquetes de balde ou de pago que lles permitan acceder a oportunidades adaptábeis e flexíbeis para mellorar as súas estratexias de trato ao cliente. Todo isto enviando información a aqueles usuarios que estean subscritos. Unha das grandes vantaxes deste servizo, contan dende TokApp, é o aforro de papel, tinta, chamadas de teléfono e tempo que se pon en xogo. Pero hai máis factores de beneficio, como por exemplo “a comunicación directa, a privacidade, o ilimitado das mensaxes e a rapidez do proceso”.
Nada en Vigo pero “con vocación universal e orientada ás PEME”, TokApp Direct, que xa conta cunha base de datos próxima aos 2.000.000 de empresas entre España e Portugal, dispón de diversas funcionalidades para o mundo dos negocios e a comunicación entre os seus integrantes, sendo o chat só unha parte do conxunto. De feito, TokApp Direct tamén ten capacidade de xeolocalización para restrinxir a procura dunha empresa ou negocio ás inmediacións de onde nos atopemos. Ademais, dado “que se trata dunha ferramenta profesional”, TokApp Direct coida a privacidade dos usuarios encriptando a información que se envía sen almacenala en ningún servidor intermedio. Por outra banda, o rexistro inicial non depende dun número de teléfono, podendo facerse a través de correo electrónico mesmo en tablets sen tarxeta SIM.

PUBLICIDADE