Premiado un investigador da UVigo polas súas contribucións á seguridade viaria con nubes de puntos

venres, 31 de xullo do 2020 Sonia Pena

Poden as tecnoloxías actuais evitar atropelos e accidentes e converter as rúas e as estradas en espazos máis seguros para os viandantes? Se temos en conta os resultados do traballo máis recente do investigador Jesús Balado, membro do grupo de Xeotecnoloxías Aplicadas da Universidade de Vigo, a resposta só pode ser afirmativa se mire por onde se mire. Segundo nos conta a UVigo, na súa tese Balado afondou na creación de mapas para calcular rutas seguras para viandantes. Estes mapas de peóns xerados a partir de nubes de puntos merecéronlle a obtención do Premio Abertis sobre Seguridade Viaria.
O investigador quixo reivindicar as posibilidades que abre a creación de mapas de nubes de puntos, cos que é posíbel clasificar os elementos do solo urbano (beiras, escaleiras, ramplas) e, con esa información, dar forma a un mapa que nos axude a calcular rutas reais e seguras para camiñantes, transitando por beirarrúas ou cruzando pasos de peóns. A través destas tecnoloxías tamén se salva un dos principais escollos que poñen no camiño aplicacións como Google Maps, que xeran itinerarios que na práctica non son viábeis para o seu uso por parte dos peóns, ao estar baseados principalmente en mapas de estradas, o “que se traduce en que o itinerario proposto transcorre por unha vía que pode non ter beirarrúas aos lados ou cruzar por lugares que non son seguros”. Outra das vantaxes da técnica que propón Balado na súa tese é a posibilidade de comprobar se as zonas a transitar son accesíbeis, diferenciando traxectos para individuos con mobilidade reducida e os que non a teñen.
Esta alternativa centra a tese de doutoramento Classification and modelling of urban environments from point clouds for physical accessibili-ty diagnosis and pedestrian pathfinding, de Jesús Balado, gañador do Premio Abertis 2019 sobre Seguridade Viaria, dotado con 7000 euros.
A Cátedra Abertis, promovida polo grupo internacional en xestión de infraestruturas para a mobilidade e as comunicacións, a súa fundación, a Universidade Politécnica de Catalunya e a Universidade Politécnica de Madrid, creou no ano 2016 o devandito recoñecemento, dirixido a distinguir estudos e traballos de investigación inéditos realizados por alumnado universitario que contribúan a mellorar a seguridade viaria, a mobilidade sustentábel, responsábel e segura.
O investigador do grupo de Xeotecnoloxías Aplicadas atópase actualmente, cunha bolsa posdoutoral da Xunta, realizando unha estadía internacional na Universidade Técnica de Delf, nos Países Baixos, onde prosegue co seu traballo sobre as nubes de puntos. “Agora mesmo sigo investigando en nubes de puntos, non unha aplicación tan directa como a tese de doutoramento, senón o uso das nubes como modelos e no estudo e corrección das oclusións”, detalla Balado, que considera que afondando neste aspecto teórico poderán usarse as nubes de puntos para máis aplicacións no futuro.

PUBLICIDADE