Prince elimina a súa música dos servizos de streaming
xoves, 2 de xullo do 2015
Aínda que daba a impresión de que co lanzamento de Apple
Music a industria musical parecía aceptar definitivamente o streaming como método de distribución da
súa música, parece que aínda non están todos os artistas conformes, e incluso
músicos que tiñan a súa música dispoñible baixo tal formato mudan de idea, e
nas últimas horas vimos como Prince retirou os seus temas da meirande parte de
servizos deste tipo como Spotify, onde ao consultar a ficha
do artista podemos ler que “o editor de Prince solicitou a todos os
servizos de streaming a retirada do
seu catálogo. Atendemos tal petición e esperamos recuperar a súa música en
canto sexa posible”.
A relación de Prince coa Internet sempre foi moi polémica, e incluso resístese
a figurar en YouTube (servizo ao que chegou a denunciar por facer uso da súa
música sen autorización), onde actualmente só ten unha canción de xeito oficial
(Breakfast Can Wait),
borrou todos os contidos da súa
efémera conta de Twitter e incluso presentou moita resistencia a vender a
súa música a través da Internet. Queda agora por ver se estamos ante unha
arroutada máis do príncipe de Minneapolis ou dunha decisión de calado que
poidan seguir outros artistas.